Diretór MAP munisípiu Baucau, Moises Lobato Perreira. Imajen TATOLI/Natalino Belo

BAUCAU, 11 juñu 2021 (TATOLI)–Diretór Ministériu Agrikultura no Peska (MAP) munisípiu Baucau, Moises Lobato Perreira, informa, daudaun ne’e halo hela planu longu prazu atu konstrui irrigasaun natar hodi fasilita bee ba agrikultór sira.

“Ami planeia konstrui irrigasaun fazeadamente, nune’e bele reativa fali natar ne’ebé durante ne’e abandona, tamba haree foin daudaun ne’e iha nesesida tamba afeta maka’as hosi surtu COVID-19,” Diretór ne’e dehan ba Agência TATOLI, ih ninia knaar fatin, Villa nova, Baucau, sesta ne’e.

Notísia relevante: Rekonstrusaun irrigasaun ualu iha faze preparasaun loke konkursu

Tuir nia, MAP Baucau iha programa ida ho sub-programa tolu, ne’ebé atu atinje meta tinan 2022, ne’ebé foka ba área irrigasaun.

Daudaun ne’e, hetan apoia hosi United Nations Development Programme (UNDP) atu konstrui kanál irrigasaun iha suku Baha-mori, postu admistrativu Venilale, munisípiu Baucau.

MAP Baucau kontinua reforsa serbisu tékniku natar sira ne’ebé mak durante ne’e abandona,  liuliu problema bee inklui kontinua koordena ho Governu sentrál atu normaliza irrigasaun ne’ebé sei bele fornese bee ba komunidade.

Nune’e, esforsu konstrui irrigasaun ho kuantidade boot, maibé ba kuantidade kiik sei inklui de’it iha planu orsamentu munisipál atubele hetan apoia hosi Programa Nasionál ba Dezenvolvementu Suku (PNDS) no Planu Intergradu Dezenvolvementu Munisipál (PIDM).

Planu konstrusaun irrigasaun ho kuantidade boot iha área postu administrativu Venilale, Baucau villa, suku Samalari, Uailili, Seisal, Kaibada no postu administrativu Laga iha suku Teknomata.

Tuir dadus, natar iha Baucau pur volta ektare 15.000, ne’ebé kada postu admistrativu, natar ne’ebé mak funsiona pur volta ektare 7.000 to’o 8.000.

 Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here