Uma komunidade iha Bidau ne’ebé hetan estragu hosi inundasaun iha 04 abríl 2021. Imajen Tatoli/António Gonçalves.

DILI, 11 juñu 2021 (TATOLI)—Sekretária Estadu Terras no Proriedade (SETP), identifika ona rai iha fatin tolu, hodi prepara ba planu re-alozamentu família iha Dili, ne’ebé hela iha fatin risku ba dezastre naturál.

Fatin tolu ne’e identifika provizóriu hanesan Bekudu ho Tibar nu’udár rai Estadu, maibé iha Hera área Hali-Dolár parte foho hun nu’udár rai privadu no Estadu presiza hola,’’ SETP, Mário Ximenes, hateten ba jornalista Agéncia Tatoli, iha kna’ar fatin Colmera, sesta ne’e.

Notísia relevante:SEPS kontinua verifika dadus ba apoiu materiál konstrusaun

Oras ne’e daudaun SETP iha hela prosesu negosiasaun ho komunidade atu sosa rai ne’e, no sei fornese informasaun ba Ministériu Planu Ordanementu (MPO), nu’udár implementadór ba planu re-alozamentu.

Fasilitasaun ba informasaun ne’e atu bele halo indemizasaun kona-bá rai nia-folin ho ai-horis no atu fó MPO  nu’udár na’in ba planu atu prepara orsamentu.

Governante ne’e hateten, iha Hera Hali-Dolár  área besik estrada-ibun iha rai ektare 12 nu’udár rai Estadu, maibé ekipa Ministéiru la deside utiliza tanba rai tetuk no produtivu ka poténsia, ne’ebé bele utiliza ba buat seluk.

“Antes ne’e Governu planeia atu harii terminál, nune’e iha desizaun provizóriu, rai privadu ektare ualu ba fali parte Hali-Dolar área besik foho ne’ebé bele utiliza ba konstrusaun,” nia subliña.

Iha identifikasaun ne’e, SETP hetan rai provizóriu iha Hera ektare-ualu (titulu privadu), Beduku iha rai ektare-rua no Tibar iha ektare-ne’en, SETP rejista abitante na’in 23 mak daudaun ne’e hela iha rai ne’e.

Tuir planu urbanizasaun atu konstrui abitasaun ba komunidade, automatikamente komunidade ne’ebé hela antes ona iha fatin sira ne’e, presiza integra.

Ho dezastre ne’ebé foin lalais akontese, família-sira ne’ebé hela besik iha área risku hanesan Lagoa Tasi-tolu, mota ninin no ho foho lolon, Governu liu hosi Konsellu Ministru deside fó serbisu ba Vise Primeiru Ministru no Ministru Planu Ordenamentu (MPO) koordena ho Sekretária Estadu Ambiente (SEA), SETP ho Sekretária Estadu Protesaun Sivíl (SEPS), atu haree ba re-alozamentu família hirak-ne’e ba fatin seguru, nune’e prevene dezastre iha tempu tuir-mai.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here