Edifísiu eskola Ensinu Sekundáriu Jerál (ESJ) 04 setembru, Balide, Dili. Imajen Tatoli/dok.

DILI, 25 maiu 2021 (TATOLI) – Reprezentante Sekretáriu Estadu Protesaun Sivíl (SEPS) Antoninho Viegas, husu ba dirijente eskola Ensinu Sekundáriu Jerál (ESJ) 04 setembru, Balide, Dili, atu kontinua fasilita sala rua ba família uma-kain haat tanba labele fila ba sira-nia hela fatin.

Notísia Relevante : Vítima dezastre naturál iha Eskola UNAMET husu ai-han no ropa

Antoninho Viegas hato’o rekomendasaun ne’e ba dirijente ESJ 04 setembru bainhira halo diálogu ho família uma-kain 56  ne’ebé atu re-integra hikas ba komunidade.

 “Ha’u husu ba dirijente eskola ne’e atu nafatin fasilita hela ita-nia família uma-kain haat tanba sira laiha duni fatin atu hela, kauza hosi inundasaun, 04 abríl liubá,” Antoninho Viegas hateten iha diálogu entre parte eskola, komunidade no Governu ne’ebé realiza iha eskola 04 setembru, Balide, Dili, tersa ne’e.

Nia dehan, serimónia re-integra uma-kain 52 ba komunidade ne’e sei realiza kuarta (26/05) tanba tenke fó tempu ba sira atu prepara uluk kondisaun molok fila ba ida-idak nia uma. Família uma-kain atu fila ne’e, sira-nia uma hetan inundasaun maibé la grave. Tan ne’e sira tenke fila hodi fó espasu ba eskola atu halo preparasaun.

Nia husu mós ba dirijente eskola atu kontinua tau matan ba uma-kain haat sei hela ne’e, karik tempu besik eskola presiza aula-rua atu hala’o atividade tenke informa lalais ba SEPS hodi prepara fali fatin seluk ba sira.

Iha fatin hanesan Diretór Eskola ESJ 04 setembru, Balide, Sergio da Cruz, akresenta sira kontinua oferese sala-rua ba família uma-kain haat, sala ida uma-kain rua mak utiliza. Família sira-ne’e uluk hela iha arredores eskola tanba inundasaun, 04 abríl liubá.

“Ami kontinua oferese fatin ba sira, tanba ami hein programa Governu nian atu re-aloka família afetadu-sira ba fatin seluk,” Sergio da Cruz hateten.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here