Ministra Negósiu Estranjeiru no Kooperasaun, Adaljiza Albertina Xavier Magno asina MoU ho Embaxadór Portugál iha Timor-Leste, Pedro Machado Vieira, iha salaun MNEK, kinta 10 juñu 2021. Imajen TATOLI/António Goncalves

DILI, 10 juñu 2021 (TATOLI) – Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno ho Embaixadór Portugál mai Timor-Leste, Pedro Machado Viera, kinta ne’e, edifísiu MNEK, Dili, asina memorandu entendimentu (MoU/Memorandum of Understanding) hodi hametin kooperasaun entre parte-rua.

Notísia Relevante : MNEK loke dalan ba diplomasia ekonomia

“Ami asina memorandu ida ho Embaixada Portugál atu bele iha diálogu ida regulár, ami sei bele estabelese kada tinan  no bele tinan rua dala-ida tinan rua. Portugál ita-nia amigu ida importante tebes hamutuk durante tempu naruk no partilla lingua hanesan haforsa mós ita iha área oi-oin hanesan setór edukasaun, justisa  entaun ita presiza halo diálogu ida di’ak,” Ministra Adaljiza Magno hateten.

Nia dehan, espesífiku hosi selebrasaun memorandu entendimentu ne’e atu haree no diskute rigór liután iha setór importante ne’ebé durante ne’e nasaun rua hala’o kooperasaun.

Durante ne’e, Portugál apoiu Timor-Leste iha área oi-oin hodi reforsa dezenvolvimentu iha rai-laran mak hanesan, edukasaun, justisa, defeza no seluk tan.

Iha fatin hanesan Embaixadór Portugal iha Timor-Leste, Pedro Machado Viera, hateten, selebrasaun ba nota entendimentu ne’e importante tebes ba nasaun-rua hametin liután kooperasaun.

“Memorandu ne’ebé nasaun rua halo ne’e hanesan pasu ida hodi hametin liután kooperasaun tanba nasaun-rua ne’e iha lingua ne’ebé hanesan no Portugál prontu nafatin apoiu Timor – Leste,”  Pedro Machado Viera hateten.

Loron  komunidade Portugés sira nian

Iha oportunidade ne’e, Ministra Adaljiza Magno, hato’o parabéns ba komunidade portugés sira  iha Timor-Leste ho iha Portugál, ne’ebé selebra loron komunidade Portugés.

Nia hatutan, maski loron importante Portugál sira-nian, maibé iha Timor – Leste labele selebra hanesan baibain tanba mundu tomak no Timor- Leste enfrenta hela surtu Covid-19.

“Ita labele selebra loron espesiál ne’e hanesan kada tinan liubá tanba COVID-19. Maibé ohin selebra memorandu ida ne’e mós tama hotu ona iha selebrasaun ba ita boot sira nia loron,” Ministra Adaljiza hateten.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here