Ministra Negósiu Estranjeiru no Kooperasaun, Adaljiza Magno halo enkonytu virtuál ho Kini Wignnarja, nu’udar asistente Sekretáriu Jerál Nasoins Unidus no Diretora UNDP nian ba Asia no Pasífiku. Imajen/MNEK

DILI, 27 maiu 2021 (TATOLI)-Ministériu Negósiu Estranjeiru no Kooperasaun (MNEK) hahú ohin no aban, realiza enkontru konsellu konsultivu  (Coordinating Board Meeting/CBM) ba da-X ho forma virtuál iha Suai Room, Timor-Plaza, Dili.  Enkontru ne’e atu loke dalan ba diplomasia ekonomia no haforsa engajamentu multilaterál.

Notísia Relevante : MNEK haruka ona karta ofisiál ba apoiu internasionál

Nota  imprensa hosi MNEK ne’ebé Agência Tatoli asesu, kinta ne’e, informa, enkontru konsellu konsultivu ne’e nia funsaun hodi formula, koordena hodi observa no avalia servisu iha rai-laran tantu misaun iha rai-li’ur.

Ba tinan ne’e, iha kestaun pertinente pontu tolu ne’ebé identifikadu ona sai ajenda ba ekipa CBM hodi diskute no sei aprezenta ba reprezentante misaun Timor-Leste (TL) nian iha rai-li’ur mak hanesan, planu rekuperasaun ekonómika Post-COVID-19, resposta ba COVID-19, resposta ba situasaun Emerjénsia rai-laran no kalamidade.

Enkontru ne’e mós realiza ho objetivu hodi diskute servisu ne’ebé misaun sira atinje ona iha tinan 2020 no meadu 2021, alende mós diskute atividade no prioridade ne’ebé tau iha planu ba misaun nian iha tinan ne’e no tinan oin, relasiona ho meta polítika esterna Timor-Leste.

Meta polítika esterna Timor-Leste iha kapitál sei fó oportunidade investimentu ba País sira ne’ebé estabelese ona relasaun bilaterál ho Timor-Leste hodi oferese oportunidade iha área ekonomia no komérsiu liuhosi diplomasia ekonomia ho objetivu lori emprezáriu-sira hosi nivel ki’ik to’o boot hodi mai investe iha Timor-Leste.

Partisipante sira iha enkontru ne’e mak hanesan, Ministra Negósiu Estranjeiru no Kooperasaun, Adaljiza Albertina Xavier Reis Magno, akompaña hosi vise-MNEK, Julião da Silva, hosi Sekretáriu Jerál-MNEK, Diretór Jerál sira, Xefe Misaun, Charge d’Affaires, Konsul Jerál-Ajente,  Inspetór Jerál, Koordenadór Institutu Estudu Diplomátiku (IED-MNEK) no Diretór Ezekutivu ACTL-MNEK.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here