Primeiru-Ministru, Taur Matan Ruak. Imajen TATOLI/Egas Cristóvão

DILI, 10 juñu 2021 (TATOLI)–Primeiru-Ministru (PM), Taur Matan Ruak, konfirma, nia parte sei lapartisipa iha Simeira Komunidade País ho Lian Portugés (CPLP, sigla portugés), ne’ebé sei hala’o iha Luanda, Angola, iha 17 jullu 2021.

“Ha’u la partisipa, maibé konserteza sei iha reprezentante,” Xefe Governu, hateten, hafoin reuniaun semanál ho Xefe Estadu iha Palásiu Prezidensiál, Bairro Pité, kuinta ne’e.

Notísia relevante: Posibilidade delegasaun Timor-Leste partisipa simeira CPLP iha Luanda

Iha enkontru ne’e, parte rua ko’alia mós kona-ba preparasaun Zacarias Albano da Costa, sai Sekretáriu Ezekutivu CPLP, reprezenta Timor-Leste.

Antes ne’e Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten, iha posibilidade delegasaun hosi Timor-Leste partisipa iha Simeira CPLP, tanba ne’e, Ministra hasoru malu ho PM hodi husu disponibilidade partisipa iha reuniaun internasionál ne’e.

Simeira ne’e hahú preparasaun iha 10 jullu, tanba ne’e molok realiza, sei hala’o uluk reuniaun Konsellu Ministru no reuniaun téknika sira, tanba delegasaun tenke iha Angola molok besik seremónia.

Ajenda importante ne’ebé sei diskute iha simeira ne’e kona-ba mobilidade, ne’ebé disponibiliza sidadaun membru CPLP sira asesu livre.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here