Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen TATOLI/Egas Cristóvão

DILI, 07 juñu 2021 (TATOLI)–Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten, iha posibilidade delegasaun hosi Timor-Leste partisipa iha simeira Komunidade País ho Lian Portugés (CPLP, sigla portugés), ne’ebé sei hala’o iha loron 17 jullu 2021, iha Luanda, Angola.

Tanba ne’e, Ministra hasoru malu ho Primeiru-Ministru, Taur Matan Ruak, hodi husu disponibilidade partisipa iha reuniaun internasionál ne’e.

“Ha’u hasoru Primeiru-Minsitru hodi ko’alia kona-ba simeira CPLP iha Angola iha jullu ne’e, ne’ebé husu disponibilidade Primeiru-Ministru no Prezidente Repúblika, bele bá ka lae, nune’e ami organiza hela kestaun ne’e,” Ministra Adaljiza Albertina, informa hafoin reuniaun ho Xefe Governu, iha Rezidénsia Farol, segunda ne’e.

Nune’e, MNEK hein hela resposta hosi Prezidente Repúblika hodi halo preparasaun molok partisipa iha enkontru CPLP.

“Kuandu bá, ha’u mak sei akompaña hamutuk ho delegasaun MNEK, tanba fó pose ba Sekretáriu Ezekutivu foun CPLP, maibé Primeiru-Ministru posibilidade boot labele ba, karik Prezidente Repúblika bá maka ha’u akompaña,” nia akresenta.

Iha enkontru ne’e, MNEK ho Xefe Ezekutivu ko’alia mós kona-ba preparasaun Zacarias Albano da Costa, sai Sekretáriu Ezekutivu CPLP, reprezenta Timor-Leste.

Notísia relevante: Zacarias Albano sei simu pose iha Angola

Simeira ne’e hahú preparasaun iha 10 jullu, tanba ne’e molok realiza, sei hala’o uluk reuniaun Konsellu Ministru no reuniaun téknika sira, tanba delegasaun tenke iha Angola molok besik seremónia.

Ajenda importante ne’ebé sei diskute iha simeira ne’e kona-ba mobilidade, ne’ebé disponibiliza sidadaun membru CPLP sira asesu livre hanesan estudante bele bá-mai eskola la presiza vistu, hanesan mós médiku no profesór sira.

“Kona-ba asuntu mobilidade, ami aprova ona iha reuniaun Konsellu Ministru via virtuál iha dezembru 2020, ne’ebé iha simeira ne’e atu legaliza de’it. Kestaun ne’e importante atu sidadaun país membru bele livre la’o bá-mai, la presiza vistu no trata dokumentu oin-oin. Ezemplu hakarak bá eskola iha Portugal, hafoin ne’e sei diskute bilateralmente implementa mobiliariu ne’e,” Ministra haktuir.

Aleinde ne’e, país membru sira sei tau hanoin hamutuk hodi kombate pandemia globál.

Tuir governante ne’e, regra ne’ebé partisipante sira tenke kumpre bainhira partisipa iha seremónia ne’e maka tenke vasina kompletu.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here