Xefe suku Holsa, António Santa Cruz. Imajen Tatoli/Sérgio da Cruz.

BOBONARO, 09 juñu 2021 (TATOLI)—Levantamentu dadus ne’ebé autoridade suku hamutuk ho ekipa Programa Nasionál Dezenvolvimentu Suku (PNDS), hala’o konsege detekta uma-kain tolu iha aldeia Bilicou, Suku Holsa, postu administrativu Maliana, munisípiu Bobonaro, mak sai benefisiáriu ba programa Uma ba Kbiit Laek (UKL).

“Ami identifika duni benifisiáriu na’in-tolu, ne’ebé vulnerável liu. Ekipa observa ona fatin atu harii uma no ita espera tempu badak bele hahú,” Xefe suku Holsa, António Santa Cruz, hateten ba jornalista Agência Tatoli, iha sede suku Holsa, kuarta ne’e.

Notísia relevante:Governu hahú ona konstrui “Uma Kbiit Laek” 1.254 iha territóriu nasionál

António Santa Cruz kontente, tanba programa UKL sei ajuda tebes komunidade ne’ebé durante ne’e hanesan família vulnerável liu.

Autoridade lokál ne’e husu komunidade vulnerável ne’ebé sidauk hetan oportunidade atu hein nafatin, tanba programa ne’e tinan ida implementa de’it dala ida, maibé sei kontinua fali ba aldeia seluk tuir planu ne’ebé trasa ona.

Governu liuhosi Ministériu Administrasaun Estatál (MAE) planeia ona atu harii UKL hamutuk 1.254 ba ema kbiit la’ek iha territóriu nasionál no lansa ona iha munisípiu Liquiça, iha (05/06).

Hosi númeru benefisiáriu ba UKL 1.254, iha munisípiu Aileu sei konstrui uma 99, Ainaro 62, Baucau 177, Bobonaro 150, Covalima 90, Dili 24 de’it tanba Postu Administrativu Ataúro ho Metinaro mak hetan Uma Kbiit Laek, Ermera 156, Lautém 102, Liquiça 69, Manatuto 93, Manufahi 86 no Munisípiu Viqueque hamutuk 108.

Notísia relevante:Governu lansa primeira pedra ba konstrusaun “Uma Kbiit Laek” iha Liquiça

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here