Prezidente Tribunál Rekursu, Deolindo dos Santos. Imajen Tatoli/Egas Cristovão

DILI, 09 juñu 2021 (TATOLI)—Prezidente Tribunál Rekursu (PTR), Deolindo dos Santos, kontinua diskute ho Prezidente Parlamentu Nasionál (PPN), Deputadu Aniceto Longuinhos Guterres Lopes, hodi aborda implementasaun Lei Medida Prevensaun no Kombate Korrupsaun (MPCC-sigla portugés) tanba lei refere vigora ona dezde fulan-fevereiru liubá.

Notísia Relevante: PTR-PPN ko’alia kona-ba deklarasaun rikusoin deputadu sira-nian

“Agora ita ko’alia kona-ba implementasaun Lei Medida Prevensaun no Kombate Korrupsaun nian ne’ebé la’o hela entaun ha’u mai ko’alia ho Prezidente Parlamentu Nasionál iha relasaun ho lista arrolamentu ne’ebé ke tribunál husu ona (mai PN), atubele maizumenus deputadu sira hira mak agora daudaun parlamentu arrola. Nune’e, Tribunál Rekursu bele halo preparasaun ba deklarasaun rikusoin ba deputadu sira-nian iha futuru mai,” Prezidente Tribunál Rekursu informa ba jornalista sira, iha Parlamentu Nasionál, kuarta ne’e.

Iha reuniaun ne’e, Prezidente Tribunál Rekursu ho Prezidente Parlamentu Nasionál diskute mós artigu 111 (Deklarasaun pretérita sira) tanba  rasik hahú hosi entrada ein-vigór, Parlamentu Nasionál sei remete ba Tribunal Rekursu.

Tanba ne’e Prezidente Tribunál Rekursu hala’o enkontru ho PPN hodi atualiza deklarasaun deputadu sira-nian, nune’e Tribunál Rekursu halo preparasaun bainhira to’o nia tempu hein prenxe de’it ona liuhosi online.

Nia dehan, lei MPCC vigora iha fulan-fevereiru 2021 liubá, entaun deputadu sira entrada vigór antes tiha ona entaun la presiza deklarasaun foun.

“Deputadu sira-ne’ebé ke iha substituisaun foun entaun tenke ser halo deklarasaun inisiál maibé deputadu sira-ne’ebé iha tiha ona ne’e só bele halo deklarasaun iha janeiru 2021 mak bele halo deklarasaun. Ida-ne’e vale mós ba parte Governu nian, tanba lei ne’e define ba oin la’ós ba fali kotuk,” nia dehan.

Entretantu, Prezidente Parlamentu Nasionál, Deputadu Aniceto Longuinhos Guterres Lopes, sei haree ida-ne’e no sei ko’alia ho Komisaun A hodi halo segimentu ba oin.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here