Prezidente Tribunal Rekursu, Deolindo dos Santos. Imajen Tatoli/Antonio Goncalves.

DILI, 05 maiu 2021 (TATOLI)—Prezidente Tribunál Rekursu (PTR) Deolindo dos Santos, kuarta ne’e hasoru malu ho Prezidente Parlamentu Nasionál Aniceto Longuinhos Guterres, ko’alia kona-ba deklarasaun rikusoin deputadu sira-nian ba Tribunál Rekursu (PTR) tanba Lei Medida Prevensaun no Kombate Korrupsaun (MPCC-sigla portugés) mak obriga.

Notísia Relevante: Formuláriu ba kargu xefia deklara rikusoin prontu ona

Prezidente Tribunál Rekursu, fó-sai ida-ne’e tanba oras ne’e Lei Medida Prevensaun no Kombate Korrupsaun tama iha faze implementasaun entaun membru órgaun soberania tenke deklara rikusoin.

“Ne’ebé Lei MPCC ne’e entrada ein-vigór ona entaun Parlamentu Nasionál tenke haruka deklarasaun deputadu sira-nian kona-ba rikusoin ne’e ba Tribunál Rekursu tanba lei mak fó,” Deolindo dos Santos informa ba jornalista sira, iha Parlamentu Nasionál, kuarta ne’e.

Tribunál Rekursu haruka tiha ona pedidu ida ba Parlamentu Nasionál kona-ba deklarasaun rikusoin ne’e rasik tanba lei MPCC mak mensiona.

Loloos ne’e deklarasaun rikusoin ne’e deklara ba tribunál supremu maibé seidauk iha entaun Tribunál Rekursu mak implementa kompeténsia ida-ne’e.

Iha opurtunidade ne’e mós Prezidente Parlamentu Nasionál no Prezidente Tribunál Tribunál Rekursu, diskute medida konkretu sira kona-ba implemenetasaun lei refere nune’e ezekusaun bele la’o di’akliu.

PTR no PPN diskute mós posibilidade realiza serimónia hodi konvida instituisaun sira-ne’ebé implementa lei ne’e hanesan Tribunál Rekursu, Komisaun Antí Korrupsaun (CAC-sigla portugés) no entidade sira seluk hodi haree dezáfiu no difikuldade ne’ebé sei hasoru iha ezekusaun.

“Sera que inísiu ne’e buat la’o di’ak ka difikuldade balun ne’ebé mak ita sei hasoru entaun presiza serimónia ruma hodi fó hanoin hamutuk kona-ba implementadór lei sira hasoru,” nia dehan.

Nia fó ezemplu lei antigu (Lei Antí Korrupsaun) ne’e prenxe ho eskrita no simples loos maibé lei foun (Medida Prevensaun no Kombate Korrupsaun) ne’e prenxe ho online entaun ema hotu iha koñesimentu atu prenxe ho online ka lae.

“Agora prenxe formuláriu ne’e presiza tempu tanba dijitál depois hatama iha sistema. Bainhira ema ruma iha interese atu prenxe bele prenxe online tanba oras ne’e Tribunál Rekursu no CAC dezenvolve hela formuláriu dijitál ne’e, maibé formuláriu ne’e ho modelu oioin tuir lei hateten,” nia dehan.

Notísia Relevante: CAC sei aplika rejime deklarasaun rikusoin ba uluk instituisaun balun

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here