Primeiru-Ministru, Taur Matan Ruak, prezide reuniaun Konsellu Ministru, iha salaun Ministériu Finansa, Aitarak-laran, kuarta (09/06). Imajen TATOLI/Egas Cristóvão

DILI, 09 juñu 2021 (TATOLI)–Governu liuhosi reuniaun Konsellu Ministru (KM) iha kuarta ne’e, deside renova Serka Sanitária iha munisípiu Baucau durante loron hitu tan no hakotu iha munisípiu Viqueque.

Desizaun ne’e KM hasai, hafoin rona aprezentasaun hosi Sala Situasaun, Sentru Integradu Jestaun Krize (CIGC, sigla portugés) kona-ba pontu situasaun epidemiolójika país.

“Konsellu Minsitru aprova Projetu Rezolusaun Governu, ne’ebé mantein impozisaun Serka Sanitária iha Baucau ba loron-hitu tan no deside la renova iha Viqueque,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha salaun auditóriu Ministériu Finansa (MF).

Iha biban ne’e, KM kontinua mós impoin Serka Sanitária iha munisípiu Bobonaro, Dili no Covalima.

Notísia relevante: Governu mantein impozisaun Serka Sanitária iha Baucau, Covalima no Dili

Nune’e, bandu sirkulasaun ema entre munisípiu Baucau no sirkunskrisaun administrativa sira seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian.

Portavóz Governu ne’e dehan, Governu deside termina serka sanitária iha Viqueque bazeia ba aprezentasaun hosi CIGC kona-ba taxa infetadu COVID-19 iha munisípiu refere hahú menus.

Maski nune’e, Governu kontinua husu ba populasaun Viqueque atu kontribui maka’as liután iha esforsu redús taxa infesaun iha munisípiu ne’e.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here