Primeiru-Ministru, Taur Matan Ruak, prezide reuniaun Konsellu Ministru, iha salaun Ministériu Finansa, Aitarak-laran, kuarta (12/05). Imajen TATOLI/Egas Cristóvão

DILI, 12 maiu 2021 (TATOLI)—Koordenadór sira hosi Sala Situasaun-Sentru Integradu Jestaun Krize (SS-CIGC, sigla portugés) halo aprezentasaun kona-ba pontu situasaun epidemiolójika iha Timor-Leste iha reuniaun Konsellu Ministru (KM) iha kuarta ne’e.

Hafoin rona no analiza aprezentasaun ne’e, Governu aprova Projetu Rezolusaun ne’ebé mantein impozisaun Serka Sanitária iha munisípiu sira Baucau, Covalima no Dili ba loron 14 tan.

“Kontinua bandu sirkulasaun ema entre munisípiu tolu ne’e no sirkunskrisaun administrativa sira seluk, exetu iha kazu fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian,” Ministru Prezidénsia Konsellu Ministru, Fidelis Manuel Leite, relata hafoin ramata reuniaun ezekutivu, iha salaun auditóriu Ministériu Finansa (MF), Aitarak-laran, kuarta ne’e.

Notísia relevante: Governu impoin serka sanitária iha munisípiu tolu-renova munisípiu neen

Antes ne’e, impozisaun Serka Sanitária iha munisípiu Baucau, Covalima no Dili sei termina iha tuku 23:59 loron 16 maiu, ne’ebé ho rezolusaun ne’e maka extende tan ba loron 14.

Tuir Portavóz Governu, iha munisípiu Dili mantein nafatin impozisaun konfinamentu domisiliáriu jerál ba ema hotu ne’ebé hela ka oras ne’e daudaun iha Dili, exetu iha razaun forte, liuliu relasiona ho seguransa públika, serbisu no ba asesu sasán no servisu ba nesesidade bázika.

Enkuantu, KM deside ona la renova impozisaun serka sanitária, ne’ebé sei vigora to’o loron 16 maiu iha munisípiu sira hanesan Ainaro, Ermera, Lautém, Liquiçá, Manufahi no Viqueque.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here