Estudante sira simu Prezidente Republika, Francisco Guterres Lú Olo bainhira vizita ba Eskola Sekundária Jerál Públiku (ESJP) Seran-Kotek, Munisípiu Covalima, Kinta (27/06/2019). Imajen TATOLI/Eugénio Pereira.

COVALIMA,  09 juñu 2021 (TATOLI)—Diretór Ministériu Edukasaun, Juventude no Desportu (MEJD)  Munisípiu Covalima, Edmundo Ferreira, rekoñese katak, estudante-sira iha Munisípiu Covalima, liuliu sira iha área remotas, susar tebes atu asesu ka akompaña programa Eskola ba Uma liuhosi Rádiu Televizaun Timor-Leste (RTTL), inklui susar liu atu partisipa iha aula online.

Notísia Relevante : Edukasaun Covalima suspende prosesu aprendizajen

Edmundo Ferreira, hateten sasidik ne’ebé estudante ho inan-aman sira enfrenta maka balun laiha televizaun ka rádiu no maioria  inan-aman sira laiha kapasidade finanseiru atu sosa telemovel android no laiha osan atu sosa pulsa fó ba nia-oan sira asesu eskola online.

“Eskola hotu iha Munisípiu Covalima, hahú hosi eskola pre-eskolár no eskola  tékniku vokasionál suspende hotu bazeia despaixu hosi Ministériu Edukasaun. Iha meiu ne’ebé bele fasilita atu estudante-sira estuda iha uma liuhosi programa Eskola ba Uma no Eskola Online, maibé difisil uitoan ba inan-aman ho estudante-sira iha foho tanba família balun laiha televizaun no rádiu no laiha mós kbiit atu sosa telemovel android ba oan-sira,” Edmundo Ferreira, informa ba  Agência Tatoli iha Salele, Covalima, kuarta ne’e

Parte seluk, Edmundo Ferreira hatutan, rede ka liña internet iha Covalima, liuliu iha área remotas kuaze laiha. Tanba ne’e, profesór-sira uza maneira hodi halo rezumu matéria fahe  ba estudante sira atu estuda iha uma.

“Husu ba inan-aman sira atu akompaña oan sira estuda iha uma ho didi’ak,” Edmundo Ferreira hateten.

Total eskola ne’ebé eziste iha Munisípiu Covalima 100-resin ho total  profesór na’in-1.065.

Jornalista       : Celestina Teles 

Editór             : Francisco Simões 

HAKEREK NO HATÁN

Please enter your comment!
Please enter your name here