Pamfletu Eskola Bázika Sentrál De Ladi, Covalima. Imajen Tatoli/Eugénio Pereira

COVALIMA, 19 fevereiru 2021 (TATOLI) – Inspetór Jerál Edukasaun Munisípiu Covalima, kinta (18/02), hasai karta sirkulár hodi suspende provizóriu prosesu aprendizajen eskola sira hotu iha Covalima hahú hosi  loron 19 fevereiru to’o loron 03 marsu 2021.

Diretór Eskola Bázika Sentrál De Ladi Suai-Vila, Pedro Amarál. Imajen Tatoli/Eugénio Pereira

Diretór Eskola Bázika Sentrál De Ladi Suai-Vila, Pedro Amaral, informa sira simu ona karta sirkulár ne’e hodi orienta estudante fila ba sira ida-idak nia uma atu kontribui no proteze  aan hosi ameasa peste letál COVID-19.

Notísia Relevante : PN husu MEJD hasai desizaun ba atividade eskolár iha Bobonaro-Covalima

“Ami simu  ona informasaun hosi ita-nia Ministériu Edukasaun Munisipál ne’ebé fó sai hosi Inspetór Jerál katak, suspende prosesu aprendizajen to’o loron 03 marsu maka foin hahú fali aula,” Pedro Amaral, informa ba jornalista iha Suai, sesta ne’e.

Nia dehan, desizaun Edukasaun Munisipál Covalima suspende prosesu aprendizajen hodi orienta estudante, inklui profesór sira kumpre regra Estadu Emerjénsia (EE).

Pedro konsidera desizaun ne’e di’ak tebes hodi salva estudante no profesór sira-nia vida hosi ameasa COVID-19 ne’ebé oho ona ema lubun iha nasaun barak, liuliu nasaun viziñu Indonéziu.

Eskola Bázika Sentrál De Ladi iha  alunu  hamutuk na’in-1067 kompostu hosi mane 549 no feto 518 ho totál profesór na’in-41.

 Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here