Dadur sira iha Prizaun Becora. Imajen/dok.espesiál

DILI, 09 juñu 2021 (TATOLI)—Prizioneiru ho guarda prizionál iha estabelesimentu prizaun Becora ne’ebé antes ne’e rejistadu na’in 227 infetadu COVID-19, oras-ne’e na’in 202 mak rekoperadu, na’in 16 mak sei kontinua hala’o tratamentu kompostu hosi prizioneiru na’in 15 no guarda prizionál na’in-ida.

“To’o horisehik ha’u simu informasaun hosi prizaun Becora, prizoneiru 218 ne’ebé antes ne’e infetadu ho guarda prizional na’in-sia, agora hela dadur na’in 15 ho guarda prizionál na’in-ida mak sei pozitivu, restu rekoperadu,’’ Ministru Justisa (MJ), Manuel Cárceres da Costa, hateten ba jornalista Agéncia Tatoli, iha knaar fatin Caicoli, tersa ne’e.

Notísia relevante:COVID-19: MJ atualiza númeru prizioneiru infetadu ba PM Taur

Númeru rekoperadu ne’e, inklui dadur na’in-tolu ne’ebé antes ne’e baixa iha izolamentu Vera Cruz no fila-hikas ona ba estabelesimentu prizaun Becora.

Governante ne’e esplika, dadur na’in 16 ne’ebé sei pozitivu ho kategoria kamán no oras-ne’e izola de’it iha prizaun Bekora, ne’ebé hetan akompañamentu hosi ekipa médiku.

Kona-bá prizaun Suai ne’ebé antes ne’e iha dadur na’in 63 infetadu, oras ne’e iha na’in-sia mak rekoperadu no na’in 54 sei nafatin izola iha prizaun laran, Ministériu Justisa koordena ho Ministériu Saúde hodi kria postu saúde permanente ho médiku atu halo akompañamentu.

Enkuantu, prizaun Gleno to’o agora seidauk rejista kazu infetadu COVID-19 hosi dadur no guarda prizionál-sira.

MJ liu hosi estabelesimentu prizionál-sira kontinua aplika prevensaun hanesan suspende vizita família ho sira-seluk atu evita transmisaun virus COVID-19.

Tuir dadus, prizaun Becora iha dadur 548, prizaun Gleno 111 no prizaun Suai 99.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here