Sekretáriu Ezekutivu CPLP, Zacarias Albano da Costa. Imajen/Espesiál

DILI, 08 juñu 2021 (TATOLI) – Sekretáriu Ezekutivu foun ba Komunidade Ko’alia Lian Portugés (CPLP-sigla Portugés), Zacarias Albano da Costa, hateten durante nia mandatu sei hala’o servisu tuir estatutu Sekretáriu Ezekutivu CPLP nian.

Notísia Relevante : Zacarias Albano agradese konfiansa nu’udar Sekretáriu Ezekutivu CPLP dezignadu Timor-Leste

“Servisu ne’ebé hala’o mak hanesan ko’alia iha artigu 2-3 iha estatutu Sekretáriu Ezekutivu nian mak hanesan konvoka reuniaun ho situasaun ne’ebé justifika, responde ba finansas jerál no patrimóniu CPLP nian, reprezenta CPLP iha forum Internasionaís, selebra akordu ho organizasaun-sira seluk, ajénsia internasionál hotu depois komité konsentrasaun permanente aprova ona no seluk tan,”  Zacarias Albano da Costa hateten hodi responde Agência Tatoli iha edifísiu Ministériu Negósiu Estranjeiru no Kooperasaun (MNEK), Dili, tersa ne’e.

“Simu akreditasaun reprezentante estadu membru ou observadór asosiadu-sira. Hanesan Embaixadór ida  atu ba intriga kredénsia tenke entrega ba Sekretáriu Ezekutivu, ha’u nia servisu responde no simu mós instrusaun hosi órgaun CPLP nian ne’ebé boot liu mak konferénsia Xefe Estadu no Governu, Konsellu Ministru mak hanesan Ministru Negósiu Estranjeiru nasaun CPLP hotu halibur mak bolu Konsellu Ministru,” eis Ministru Negósiu Estranjeiru no Kooperasaun  ne’e esplika.

Zacarias informa tan, servisu seluk ne’ebé nia hala’o iha estatutu ne’e mak bele delega servisu balu ba diretór jerál ka reprezentante seluk iha nasaun li’ur.

“Iha estatutu artigu 3 nian hatete, Sekretáriu Ezekutivu hanesan personalidade ida as liu estadu membru CPLP nian ne’ebé eleitu hosi konferénsia Xefe Estadu no Governu ba mandatu tinan rua. Ita nian hosi uluk kedan seidauk nomeia ema ida atu ba tur hanesan Sekretáriu Ezekutivu maibé ha’u ba tur foin dala uluk timoroan ida sai Sekretáriu Ezekutivu,” eis prezidente Partidu Sosiál Demokrata (PSD) ne’e afirma tan.

 Tuir estatutu CPLP nian bainhira Sekretáriu Ezekutivu nia mandatu tinan rua termina bele re-nomeia ba mandatu dala-ida tan tuir desizaun Xefe Estadu no Governu-sira membru CPLPN.

Tuir oráriu, eis membru Parlamentu Nasionál (PN) hosi Bankada PSD ne’e sei simu pose iha ba pozisaun Sekretáriu Ezekutivu CPLP iha Luanda, 17 jullu 2021 no arranka hosi Dili ba Lizboa- Portugal, 16 juñu no arranka ba Luanda iha loron 14 jullu 2021.

“Bainhira simu posse iha Luanda, servisu ne’ebé primeiru ha’u hala’o mak hasoru malu ho Prezidente ein-ezersísiu ne’ebé Prezidente Repúblika Angola nian. Depois ha’u sei hasoru mós Prezidente Konsellu Ministru hanesan Ministru Negósiu Estranjeiru Angola nian, iha ajenda rua ne’e mak dala uluk ha’u sei hala’o. Ha’u nia atividade iha Luanda mak sei hala’o vizita ida ba Sekretariadu Permanente Asembleia Parlamentár CPLP nian,” Zacarias Albano da Costa hateten.

Zacarias Albano da Costa, moris iha Remexio-Aileu, iha loron 16 janeiru 1964. Nia mós iha esperiénsia asume knar importante no estratéjiku iha ajénsia internasionál lubun iha Timor-Leste dezde tempu UNTAET to’o mai Timor restaura nia independénsia iha 20 maiu 2002.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here