Sekretáriu Ezekutivu CPLP, Zacarias Albano da Costa. Imajen/Espesiál

DILI, 10 maiu 2021 (TATOLI)—Sekretáriu Ezekutivu Komunidade País ho Lian Portugés (CPLP, sigla portugés) dezignadu, Zacarias Albano da Costa, apresia no agradese ba konfiansa ne’ebé Governu fó ba nia no komprometidu sei hala’o knaar ho di’ak.

“Ha’u mai hasoru Primeiru-Ministru ba dahuluk atu agradese konfiansa ne’ebé VIII Governu atribui ba ha’u atu sai nu’udar Sekretáriu Ezekutivu CPLP nian ba períodu tinan 2021-2023, ne’ebé posibilidade bele estende to’o tinan 2025. Ha’u-nia mandatu sei hahú hafoin Xefe Estadu no Governu konfirma ha’u-nia naran iha simeira Xefe Estadu iha Luanda iha loron 17 jullu 2021,” Sekretáriu Ezekutivu dezignadu ba CPLP, relata hafoin ramata reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.

Maski nune’e, Zacarias Albano seidauk konfirma reprezentante Timor-Leste nian iha reuniaun nível a’as iha Luandu.

“Ita seidauk hatene reprezentante ita-nia nasaun, maibé naturalmente Primeiru-Ministru sei nomea no sei haruka ema ruma, ne’ebé sei partisipa mós hosi Ministra Negósiu Estranjeiru no Kooperasaun (MNEK) inklui ha’u rasik ne’ebé sei iha ne’ebá atu simu konfiansa hosi Xefe Estadu no Governu CPLP nian,” Diplomata ne’e akresenta.

Iha sorin seluk, nia sente previléjiu boot tanba tinan ne’e bele selebra tinan 25 CPLP, ne’ebé iha tinan hirak liubá, nia rasik nu’udar membru Komisaun Koordenadór Frente Diplomátika hamutuk timor-oan sira seluk  partisipa iha simeira CPLP.

“Timor-Leste partisipa desde inísiu CPLP moris iha tinan 25 liubá, tanba ne’e nu’udar nasaun ne’ebé desde inísiu kedas partisipa, tinan ne’e sente urgullu boot tanba tinan 25 ona, ba dahuluk timor-oan ida bele asume xefia ba Sekretáriu Ezekutivu CPLP, maibé problema barak maka tenke rezolve,” nia hatutan.

Tuir Zacarias Albano, CPLP liu ona momentu difísil iha parte finanseira, tanba nasaun balun la selu kuota.

“Ha’u hanoin situasaun ida-ne’e sei muda iha futuru no sei muda partikularmente bainhira ha’u asume kargu Sekretáriu Ezekutivu CPLP ,” nia otimista.

Durante enkontru, Xefe Governu komprometidu sei fó apoiu tomak ba serbisu ne’ebé sei hala’o no presiza ba nesesidade CPLP nian.

“Nu’udar Sekretáriu Ezekutivu komunidade ne’e, vantajen ida maka ezekuta diretiva no desizaun sira ne’ebé Estadu membru sira iha, liuliu Prezidénsia CPLP halo. Bainhira ita kaer Prezidénsia ona, ita mak define ajenda CPLP maibé ha’u nu’udar Sekretáriu Ezekutivu mak sei implementa. Vantajen seluk maka bainhira ita hola parte organizasaun ida, sei iha rotativu iha estatutu CPLP nian,” nia esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here