Prezidente APORTIL, Flávio Cardoso Neves. Imajen TATOLI/Francisco Sony

DILI, 02 juñu 2021 (TATOLI)–Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, hateten, daudaun ne’e halo ona oráriu operasaun ró-ahi KMP Tranship II.

“Oráriu ita halo ona, ró ne’e sei halo operasaun semana ida dala-ida, iha segunda ho destinasaun Oé-cusse-Dili-Ataúro no Dili-Oé-cusse-Ataúro, maibé iha nesesidade urjente ita bele fasilita iha loron saida de’it,” Prezidente APORTIL informa iha Aitarak-laran, kuarta ne’e.

Notísia relevante: Hahú aban, ró-ahi KMP Tranship II subtitui Nakroma no Success

Maski nune’e, ro-ahi ne’e seidauk bele halo operasaun tanba tripulante sira kumpre hela kuarentena. 

“Tripulante sira hosi Indonézia, mai tenke kumpre regra protokolu COVID-19,” nia akresenta.

Ró-ahi KMP Tranship II hosi Surabaya, Indonézia to’o iha Dili no atraka iha portu iha loron 25 maiu, hodi subtitui ró-ahi Berlin Nakroma no Success, ne’ebé atu halo manutensaun.

Governu liuhosi Ministériu Transporte no Komunikasaun (MTK) halo kontratu ho kompañia estranjeiru hosi Indonézia hodi bele opera ró-ahi KMP Tranship II iha Timor-Leste.

Tuir kontratu, ba kada fulan ho kustu $220.000, ho ninia kapasidade tula pasajeiru hamutuk na’in-300 inklui sasán ho kapasidade tonelada 1.000-resin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here