MJ nu’udár ajente Polísia Nasionál Timor-Leste (PNTL), submete ba primeiru interrogatóriu iha Tribunál Distritál Dili (TDD), segunda (07/06/21). Imajen Tatoli/Egas Cristóvão.

DILI, 08 juñu 2021 (TATOLI)—Tribunál Distritál Dili (TDD), liu hosi desizaun primeiru interrogatóriu, aplika prizaun preventiva ba arguidu MJ nu’udár ajente Polísia Nasionál Timor-Leste (PNTL), ne’ebé envolve iha kazu tiru mate sidadaun na’in-rua no ida kanek iha aldeia Ainitas-hun, suku Lahane Osidentál, postu administrativu Vera Crus, munisípiu Dili, sábadu (05/06).

Ministériu Públiku (MP) akuza arguidu ho krime omesídiu agravadu rua ne’ebé previstu iha artigu 139 iha kódigu penál Timor-Leste, tanba vítima na’in-rua mate no krime omesídiu tentadu ida, tanba vítima ida kanek.

Notísia relevante:Kazu Lahane, MP akuza arguidu ho krime tolu

Tribunál deside aplika prizaun preventiva, tanba iha faktu forte ba envolvimentu arguido-nian iha kazu ne’e, no bele asegura iha prosesu justisa.

“Desizaun Tribunál aplika prizaun preventive, ne’e adekuadu haree kazu ne’e no defeza sei la halo rekursu,” Defeza Câncio Freitas, hateten ba jornalista-sira iha TDD, hafoin rona desizaun Tribunál, tersa ne’e.

Antes ne’e, arguidu kumpre ona detensaun iha sela Polísia Sientífika Investigasaun Kriminál (PCIC sígla portugés) durante oras 72.

Primeiru interogatóriu ne’e prezide hosi juíz singular, Afonso Carmona, Ministériu Públiku reprezenta hosi prokuradór Jacinto Babo, Hernânio Rangel, arguidu hetan asisténsia legál hosi advogadu privadu Câncio Freitas.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here