EKSES fasilita tan estudante no abitante Covalima-oan hamutuk 264 iha Dili fila-fali ba Munisípiu Covalima, tersa (08/06). Imajen Tatoli/Arminda Fonseca

DILI, 08 juñu 2021 (TATOLI)-Ekipa Servisu Covalima Vitória ho Domin-20 (EKSES-Covalima), tersa ne’e, fasilita tan  Covalima-oan hamutuk 264 iha Dili fila-fali ba Munisípiu Covalima.

Notísia Relevante : EKSES fasilita estudante Covalima-oan iha Dili fila ba munisípiu

Koordenadór Jerál EKSES-Covalima, Mariano Tilman hateten, EKSES fasilita estudante no komunidade Covalima ne’ebé hela iha Dili fila ba munisípiu tanba situasaun ne’ebé hotu-hotu hatene katak estudante-sira iha hela iha kost ka uma aluga osan laiha atu selu no komunidade ne’ebé buka moris iha Dili mós daudaun ne’e atividade barak mak paradu halo sira la servisu.

“Ohin ami fasilita estudante no komunidade Covalima ba faze daruak nian hamutuk loloos 240, maibé tanba balu ba esforsu rasik hasai swab no trata  gia de marxa nian entaun ohin fasilita sira hamutuk 264 mak fila-fali ba Munisípiu Covalima,” Mariano Tilman ba Agência Tatoli iha Sede RENETIL, Farol, Dili.

Nia hatutan, estudante no komunidade Covalima-oan ne’ebé fila ba Munisípiu antes ne’e EKSES koopera ho Sentru Integradu Jestaun Krize (CIGC-sigla portugés), Pilár tolu, ba halo teste swab ba estudante no komunidade Covalima-oan hamutuk 100-resin iha Sede RENETIL, iha loron (04 juñu liubá no fó sai rezultadu balu negativu ba COVID-19, maibé balu mós pozitivu ba COVID-19 entaun sira ne’ebé negativu ohin halo viajen ba Covalima no sira ne’ebé pozitivu la’o tuir regra Organizasaun Mundiál Saúde (OMS) nian tama izolamentu.

Nia dehan, apoiu ne’ebé EKSES fasilita estudante no komunidade Covalima-oan iha Dili fila ba Munisípiu, la’ós EKSES mak hasai rasik osan, maibé hetan apoiu finanseiru hosi Covalima-oan ne’ebé buka moris iha rai li’ur mak haruka osan mai apoiu EKSES hodi fasilita estudante no komunidade Covalima-oan iha Dili fila fali ba munisípiu.

“Ami husu ajuda ba Covalima-oan ne’ebé buka moris iha rai liur haruka osan $2.000 mai ami aluga karreta-sira tula estudante no komunidade Covalima-oan fila ba munisípiu no karreta ne’ebé ohin tula estudante-sira fila ba Munisípiu ne’e hamutuk hitu, bus tolu no restu trek,” nia hateten.

Nia afirma, apoiu ne’ebé ohin EKSES fasilita estudante sira fila-fali ba Munisípiu la’ós to’o iha ne’e, maibé  ba oin sira nafatin esforsu lori hotu estudante no komunidade Covalima-oan ne’ebé hela iha Dili hakarak fila-fali ba Covalima, tanba daudaun ne’e estudante-sira rejistu hakarak fila hamutuk 600-resin.

Iha fatin hanesan, estudante Covalima-oan, Otilia de Araujo ne’ebé hala’o nia estudu iha Universidade Nasionál Timor Lorosa’e (UNTL), hateten nia parte kontente tebes tanba iha situasaun difisil ida-ne’e ekipa EKSES bele fasilita sira fila-fali ba sira-nia horik fatin.

“Agradese tebes ba EKSES, tanba bele fasilita ami fila-fali ba Covalima, tanba ami iha Dili hela iha kost susar ba hahán no laiha osan atu selu kost no eskola online mós osan laiha atu sosa pulsa, nune’e inan-aman mak atu haruka osan mai mós transporte públiku la halai entaun difikuldade sira ne’e mak ami hasoru deside fila-fali ba munisípiu,” nia hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here