Covalima-oan sira ne'ebé hala'o estudu iha kapitál Dili prepara ona atu halo viajen fila ba Munisípiu Covalima. Imajen Tatoli/Arminda Fonseca

DILI, 21 maiu 2021 (TATOLI)-Ekipa Servisu Covalima Vitória ho Domin-20 (EKSES-Covalima) ne’ebé destaka iha  Dili, ohin, fasilita Covalima-oan sira ne’ebé hala’o sira-nia estudu iha kapitál Dili no hela uma aluga ka “kost” fila ba Munisípiu Covalima.

Notísia Relevante : RAEOA prepara kuarentena simu Oé-Cusse-oan hosi Dili

Koordenadór Jerál EKSES-Covalima, Mario Tilman hateten, EKSES fasilita Covalima-oan sira fila ba munisípiu tanba daudaun ne’e estudante-sira hela iha “kost” susar ba hahán.

“Inisiativa hanoin atu lori fila estudante-sira ba Munisípiu Covalima tanba ita hotu hatene katak ho situasaun serka sanitária ho konfinamentu obrigatóriu, estudante-sira enfrenta menus ai-han no preokupa mós ba sira-nia “kost” ne’ebé sira hela, tanba inan-aman iha munisípiu mós agora susar atu hetan rendimentu haruka osan mai, entaun EKSES rona sira-nia preokupasaun hanoin kria kondisaun ba sira fali ba munisípiu,” Mario Tilman informa ba jornalista-sira iha Sede RENETIL, Farol, Dili.

Estudante ne’ebé fila ba Munisípiu Covalima foufoun rejistu estudante hamutuk 94, maibé ohin atu ba ne’e tun fali ba ema na’in-79, restu seluk sira rasik hili halo gia marxa no agora sira iha ona Munisípiu Covalima.

Nia afirma, estudante 79 ne’ebé  arranka ba Covalima hotu-hotu tuir ona teste swab rezultadu negativu  no  hetan hotu ona gia marxa ka karta viajen nian.

Nia hatutan, kondisaun ne’ebé EKSES kria hodi fasilita estudante sira fila-fali ba Munisípiu ne’e, nu’udár faze dahuluk ba estudante-sira, maibé tuir mai karik iha komunidade hosi ne’ebé hela iha Dili hakarak fila, EKSES prontu apoiu nafatin.

Iha fatin hanesan, Cornélia Cardoso nu’udár Covalima-oan ne’ebé hala’o estudu iha Kapitál Dili  no hela iha “kost” hateten, nia kontente tanba iha situasaun difisil ida ne’e ekipa EKSES-Covalima fasilita sira bele fila ba munisípiu.

“Ha’u agradese ba ekipa EKSES-Covalima, ne’ebé bele ajuda ona ha’u ho maluk sira ohin, ami bele fila ba ami-nia munisípiu, tanba ami hela iha Dili iha “kost”, menus ba ai-han no osan atu selu “kost” mós laiha,” Cornélia Cardoso hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here