Pesoál saúde atende hela pasiente pozitivu COVID-19 hodi transporta ba fatin izolamentu iha Dili, tersa (08/06/2021). Imajen Tatoli/António Gonçalves.

DILI, 08 juñu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 98, rekoperadu 214 no kazu ativu 2.115.

“Óbitu ne’ebé relata ohin, timoroan mane idade 86, hela iha aldeia Lirio, suku Motael, postu administrativu Vera Cruz, Dili,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, tersa ne’e.

Notísia relevante:COVID-19: pozitivu 24, rekoperadu 194 no ativu 2.232

Matebian iha istória moras kankru nomós moras króniku seluk ne’ebé iha 30 maiu deteta pozitivu SARS-CoV-2, hafoin membru família balun pozitivu iha 26 Maiu.

Família husu autorizasaun atu halo izolamentu terapéutiku domisiliár (ka auto-izolamentu iha uma rasik), maibé matebian iis-kotu iha uma, horisehik, 7 Juñu 2021.

Família ho ekipa saúde sira prepara hodi halo funerál tuir protokolu óbitu ba kazu COVID-19, ne’ebé adopta iha Timor-Leste.

Kona-bá kazu foun ohin 98 mai hosi Dili 80 no munisípiu-sira iha 18, kompostu hosi mane 47 no feto 51. Hosi totál kazu detetadu foun ohin, ho idade 12 mai karaik iha na’in-ida, entre tinan 12-59 na’in 95 (96,9%), idade 60 mai karaik na’in-rua ne’ebé proporsaun kazu sintomátiku hamutuk 12,2%.

Kumulativu kazu konfirmadu sura hosi 21 marsu 2020 to’o 08 juñu 2021 hamutuk 7.862. Hosi horisehik mai ohin, teste ne’ebé Laboratóriu Nasionál Saúde halo hamutuk 994 PCR, ho detallu hanesan tuir-mai, Vijilánsia sentinela hitu, rastreiu ba kontaktu ka Contact tracing 26, Rastreiu Aleatóriu ka Random Screening 189, Viájen sai-hosi serka sanitária hosi Dili 737, Viájen internasionál 74, Follow up iha kuarentena rua.

Totál teste PCR ne’ebé halo horisehik 07 juñu iha Munisípiu-sira seluk, RAEOA no HNGV hamutuk 550 ho detalla hanesan tuir-mai, Baucau 106, Ermera 90, Maliana 45, Maubisse 115, RAEOA 10, Suai 61, Viqueque 12 no HNGV 111.

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 7,6/100 mil abitante, enkuantu ba de’it munisípiu Díli 23,1/100 mil abitante.

Insidénsia iha leten sei nafatin hatudu katak, munisípiu Dili mak fatin ho risku bo’ot liu atu populasaun hetan da’et no hada’et tutan virus SARS-CoV-2.

Informasaun hosi izolamentu

Iha 08 juñu  2021, izolamentu Vera Cruz halo tratamentu ba kazu detetadu na’in 27, iha área obstetrisia na’in-neen no iha medisina interna na’in 20 no neonatolojia ida. Iha obstetrisia na’in-neen kategoria leve (mild) hotu.

Iha área medisina interna na’in 20. Na’in-haat grave ida uza BiPAP1, na’in-tolu uza oksijéniu ho NRM – Non-rebreather mask, na’in-sanulu moderadu, na’in-neen leve (mild). Ida iha neonatologia, kategoria leve, foin moris hosi inan pozitivu no teste PCR pozitivu.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Hahú 02 juñu  2021, ema ne’ebé rekoperadu ona hosi moras COVID-19 no liu ona hosi izolamentu terapéutiku domisiliár (iha uma-rasik) ka iha fatin ne’ebé estadu prepara, bainhira atu desloka sai husi/tama ba serka sanitária, la presiza halo swab, maibé nafatin presiza hetan autorizasaun esepsionál husi Diretór CIGC.

Atu bele prosesa autorizasaun esepsionál tenki hatuku Sertifikadu alta hosi Izolamentu, ne’ebé Ministériu Saúde, liu hosi ninia Pilár hitu, fó ba ema rekoperadu.

Apelu

Apela ba populasaun iha Timor-Leste laran tomak atu tu’ur hakmatek, kumpri ho rigór regra serka  sanitária  no konfinamentu  domisiliáriu  ne’ebé  Konsellu  Ministru  deside  no implementa ona.

Husu atu hotu-hotu kolabora  ho autoridade saúde  hodi  bele  buka-tuir  ema  hotu  ne’ebé  hetan da’et  ona virus ne’e, no izola hosi no labele hada’et-tutan ba ema ne’ebé seidauk hetan da’et.

Ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here