Serimónia lansamentu programa eskola ba uma. Imajen Tatoli/Tomé Amado.

DILI, 31 marsu 2021 (TATOLI)—Ministériu Edukasaun Joventude no Desportu (MEJD) halo lansamentu ba programa eskola ba uma no tele-eskola ba estudante ensinu báziku terseiru síkulu, Ensino Secundario Geral (ESG) no Tecnico Vocacional (TECVOC).

Ministru Armindo Maia esplika, iha tinan kotuk MEJD lansa ona programa eskola ba uma ba dahuluk, maibé ba de’it estudante hosi ensinu báziku siklu 1,2 maibé iha lansamentu ne’e ninia matéria-sira prepara mós ba estudante ensinu báziku síklu 3 inklui ESG no TECVOC.

Notísia relevante:MEJD sei elabora matéria ‘Eskola ba Uma’

“Programa ne’e sei aplika ba Munisípiu Dili, Baucau no Viqueque ne’ebé kontinua iha situasaun  serka sanitária no konfinamentu obrigatóriu,” Armindo Maia hateten iha lansamentu programa eskola ba uma, ne’ebe hala’o iha salaun enkontru MEJD Vila Verde, kuarta ne’e.

Nia esplika, MEJD lansa programa ne’e tanba oras ne’e daudaun kazu COVID-19 aumenta ba bebeik, no iha posiblidade sei taka eskola iha fatin balun ba tempu naruk, maibé MEJD garante nafatin prosesu ensinu aprendizazen bele kontinua.

“Ita garante ho maneira eskola ba uma liu hosi televizaun, eskola ba uma no tele-eskola, youtube eskola ba uma, youtube tele-eskola, facebook eskola ba uma no aplikasi eskola ba uma,” Governante ne’e subliña.

Nia mós rekoñese katak, estudante barak iha área rurál sei difísil atu asesu ba programa ne’e tanba laiha fasilidade hanesan televizaun no telefone android, maibé iha maneira seluk ne’ebé MEJD prepara maka kontinua apoiu livru ba estudante-sira.

Kona-bá ne’e, MEJD mós aprezenta ona proposta millaun $3 ba orsamentu retifikativu, ba Parlamentu Nasionál (PN) atu apoia liña internet ba estudante-sira liu hosi programa online eskola ba uma.

“Orsamentu Jerál Estadu 2021 nian ita la prevee atu apoia liña internet ba estudante-sira liu hosi programa online eskola ba uma. Maibé tanba iha orsamentu retifikativu, entaun ita husu millaun $3 atu apoia no bainhira aprova ita bele realiza,” nia esklarese.

Tinan kotuk matéria iha programa eskola ba uma ne’ebé MEJD lansa ba estudante ensinu báziku siklu 1,2 hamutuk espizódiu 60.

Oras ne’e ba ensinu báziku síklu 3 inklui ESG no TECVOC seidauk iha dadus detallu tanba prosesu gravasaun ba matéria seidauk finaliza no tuir planu ekipa tékniku sei konklui iha tempu besik.

Tuir planu, MEJD sei transmite programa ne’e liu hosi kanál Televizaun Edukasaun (TVE) ne’ebe halo Live streaming iha liña  https://fb.watch/4A4UGplwk0/, no mós Buletim Sapientia ne’ebe fo sai kada fulan tolu.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here