Zacarias Albano da Costa. Imajen TATOLI/Evaristo Soares Martins.

DILI, 18 maiu 2021 (TATOLI)—Eis Ministru Negósiu Estranjeiru no Kooperasaun (MNEK) Zacarias Albano da Costa, sei simu pose nu’udar Sekretáriu Ezekutivu Comunidade dos Países de Língua Portuguesa (CPLP) iha Luanda, Angola, iha fulan-jullu tinan ida-ne’e.

Zacarias Albano da Costa, tersa ne’e hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, ne’ebé akompaña hosi Deputadu Francisco Miranda Branco, ko’alia kona-ba kontestu dezignansaun nu’udar Sekretáriu Ezekutivu CPLP nian.

Notisia Relevante: Zacarias Albano agradese konfiansa nu’udar Sekretáriu Ezekutivu CPLP dezignadu Timor-Leste

“Timor-Leste dezigna (hatudu) ha’u liu tinan ida tiha ona no data fiksu ha’u sei simu pose iha Luanda iha loron 17 jullu no ha’u asume kedas funsaun hanesan sekretáriu ezekutivu CPLP foun ba tinan rua, no tanba iha estatutu CPLP nian dehan tinan haat maibé Xefe Estadu sira mak determina,” Zacarias Albano da Costa informa ba jornalista sira, hafoin hasoru malu ho Prezidente Parlamentu Nasionál, iha uma fukun Parlamentu Nasionál.

Zacarias sente orgullu tanba foin dahuluk durante tinan 25 nia laran, Timor-oan ida sei asume kargu boot liu iha Comunidade dos Países de Língua Portuguesa (CPLP) nu’udar Sekretáriu Ezekutivu.

Nasaun membru CPLP sira konkorda tiha ona katak iha loron 17 jullu (2021) nee, sei hala’o simeira Xefe Estadu no Xefe Governu iha Luanda, Angola, no oportunidade nia parte sei simu pose kedas hodi hala’o ninia funsaun.

“Ha’u sei simu pose iha Xefe Governu no Xefe Estadu hosi nasaun sia (9) nia-oin, ne’ebé primeira vez foin akontese tanba normalmente tomada pose sei hala’o iha Lisboa. Maibé, tanba tinan ida-ne’e ita selebra aniversáriu CPLP nian ba tinan 25 iha Luanda,” nia dehan.

Ho asinatura iha Luanda ne’e, nia dehan, nu’udar pasu importante tanba hosi CPLP bele iha sekretariadu ida permanente hodi koordena polítika estratéjiku no koordena serbisu deputadu sira-nian.

Eis MNEK ne’e ko’alia ho Prezidente Parlamentu Nasionál kona-ba posibilidade Timor-Leste atu kaer prezidénsia rotativa CPLP nian, ne’ebé kada tinan rua Estadu membru ida mak kaer, tinan ida-ne’e Angola mak asume prezidénsia to’o 2023.

“Ami ko’alia kona-ba posibilidade Timor-Leste mak atu kaer dala-ida tán iha 2023-2025.  Maibé ne’e posibilidade, se ita-nia líder sira aseita entaun atu sai kandidatu ba prezidénsia CPLP nian. Iha 2014, ita sai nu’udar uma-na’in ba prezidénsia CPLP nian, ne’e rotativu. Iha 2023, se Timor-Leste hakarak, ita lidera no husik ba boot sira mak deside,” nia hateten.

Entretantu prezidénsia CPLP oras ne’e lidera hosi Cavo Verde no sei entrega ba Angola iha loron 17 jullu no iha tinan 2023 ne’e’ posibilidade Timor-Leste mak lidera.

“Ita hein ita-nia líder sira iha nasaun ida-ne’e deside atu lidera simeira CPLP ne’ebé marka mós Prezidente Repúblika Timorense,” nia dehan.

Iha fulan-novembru 2020 liubá, Governu Liuhosi Ministériu Negósiu Estranjeiru no Kooperasaun (MNEK) Dionísio Babo Soares, dezigna kandidatura Zacarias Albano da Costa ba Sekretáriu Ezekutivu CPLP, ba períodu 2021-2023 depois hetan renovasaun ba 2023-2025.

Sekretáriu Ezekutivu nu’udar órgaun administrasaun ba koordenasaun iha CPLP nia laran, ne’ebé órgaun aas-liu deside liuhosi simeira, konsellu ministru, konsellu ba konsertasaun permanente ne’ebé konstituidu ho embaixadór sira hamutuk ho sekretariadu CPLP iha Lisboa.

Estadu membru CPLP sira komposta hosi Angola, Brazil, Cabo Verde, Guiné-Bissau, Guiné Equatorial, Moçambique, Portugál, São Tomé e Príncipe no Timor-Leste.

Notísia Relevante: Simeira CPLP adia ba 2021

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here