Família-sira lori mate-isin veteranu Mateus de Deus “Amino” ho nia oan-mane Camilio de Deus, ba Igreja Balide, Dili. Imajen Tatoli/Arminda Fonseca

DILI, 07 juñu 2021 (TATOLI)-Matebian veteranu Mateus de Deus “Amino” ho nia oan-mane Camilio de Deus, segunda ne’e, haloot ona iha semitériu públiku Becusse, Dili.

Notísia Relevante : Kazu Lahane, arguidu submete ba primeiru interrogatóriu

Aman ho oan ne’e nu’udar vítima ba insidente Lahane ne’ebé kauza hosi ajente polísia ida hodi pistola tiru vítima na’in-rua tanba de’it naksalak balun ne’ebé nia prosesu sei iha hela segredu justisa.

Matebian Mateus de Deus “Amino” ho nia oan-mane,  matebian Camilio de Deus, hetan tiru hosi Ajente Polísia ida, sábadu madrugada, iha Aldeia Ainitas-Hun Suku Lahane Orientál, Postu Administrativu Nain-Feto, Munisípiu Dili.

Liuhosi serimónia misa requiem iha Igreja Balide, Dili, Amu selebrante  Albino Ribeiro Gonçalves, aprofunda katak, nu’udár kriatura bainhira enfrenta situasaun difisil labele lori emosaun hodi domina-an, maibé hasa’e orasaun barak ba Maromak buat hotu entrega ba justisa, tanba liuhosi justisa mak sei dalan loos.

Amu Albino Ribeiro Gonçalves iha nia omilia esplika Maromak Nia kriatura ne’ebé moris iha mundu, sei enfrenta situasaun oioin no provas ne’ebé nu’udár ema hasoru dalaruma sei la tuir ema-nia hakarak hanesan akontese daudaun halo ema triste la kontente, maibé ida-ne’e mak moris tanba moris ne’e temporáriu de’it.

“Situasaun ne’ebé akontese daudaun ita hotu haree no sente.  Iha situasaun difisil ida-ne’e ita labele husik emosaun domina ita, maibé ita tenke hamutuk reza barak husu Maromak Nia grasa no entrega ba justisa,” Amu Albino Ribeiro Gonçalves hateten.

Nia dehan, iha situasaun ida-ne’e buat hotu entrega ba justisa no husu Nai Maromak bele haraik dalan ba solusaun no lia-loos hodi bele hetan rezultadu, nune’e akontesimentu ne’ebé akontese daudaun ne’e labele akontese tan iha moris loro-loron nian no timor-oan hotu bele moris iha dame nia-laran hanesan maun-alin.

Nia hatutan, moris bainhira hasoru situasaun difisil mak entrega hotu ba Maromak mak sei moris tuir Kristu Nia hakarak, tanba pontu prinsipál ne’ebé Kristu hanorin mak hatudu unidade ba maluk-sira ne’ebé presiza.

Amu Albino husu ba família matebian no ba ema hotu-hotu reza husu Nai Maromak Nia grasa ba matebian na’in-rua hodi bele hetan fatin naroman iha Nai Nia Kadunan Santu.

“Ita hamutuk reza nafatin ba matebian na’in-rua, nune’e Nai Maromak bele perdua sira-nia sala no haraik fatin di’ak ba sira,” Amu Albino Ribeiro Gonçalves hateten.

Antes lori mate-isin Mateus de Deus ho nia oan mane sai hosi Igreja Balide, família matebian, apela ba parte hotu-hotu, liu-liu joven-sira durante prosesu funerál no depois serimónia funerál laiha ema ida mak  halo asaun tun-sa’e tanba buat hotu la’o tuir prosesu entrega ba justisa.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here