MJ nu’udár ajente Polísia Nasionál Timor-Leste (PNTL), submete ba primeiru interrogatóriu iha Tribunál Distritál Dili (TDD), segunda (07/06/21). Imajen Tatoli/Egas Cristóvão.

DILI, 07 juñu 2021 (TATOLI)—Arguidu MJ nu’udár ajente Polísia Nasionál Timor-Leste (PNTL), ne’ebé involve iha kazu tiru mate sidadaun na’in-rua no ida kanek iha aldeia Ainitas-hun, suku Lahane Osidentál, postu administrativu Vera Crus, munisípiu Dili, sábadu (05/06), submete ona ba primeiru interrogatóriu iha Tribunál Distritál Dili (TDD).

Antes ne’e, arguidu kumpre ona detensaun iha sela Polísia Sientifika Investigasaun Kriminál (PCIC sígla portugés) durante oras 72, to’o partisipa iha primeiru interrogatóriu.

Notísia relevante:PDHJ husu PNTL kumpre regra utilizasaun arma

Membru PCIC lori arguidu to’o iha TDD iha segunda ne’e tuku 15:40 otl, ho liman futu metin ho aljema (borgol).

Tuir observasaun jornalista Agéncia Tatoli iha terrenu nota katak, daudaun-ne’e arguidu iha ona sala hodi hein prosesu audiénsia.

Primeiru interrogatóriu ne’e, prezide hosi juíz singulár Afonso Carmona, Ministéiru Públiku (MP) reprezenta hosi prokuradór Jacinto Babo, arguidu hetan asisténsia legál hosi advogadu privadu, Câncio Freitas, no prosesu primeiru interrogatóriu ne’e taka ba públiku.

Antes ne’e, PCIC serbisu hamutuk ho Polísia Nasionál Serbisu Investigasaun Kriminál (PNSIK), hodi halo investigasaun profunda ba involvimentu hosi ajente polísia MJ ho família to’o hamate Mateus de Deus  no oan mane, Camilio de Deus inklui hakanek joven ida, sábadu (05/06/21) madrugada.

Ekipa mós halo ona investigasaun ba pistola glock-19 ho bala musan ne’ebé suspeitu uza, inklui investiga mós grupu joven balun ne’ebé halo asaltu hodi baku rahun sasán no sunu uma suspeitu iha aldeia Gomes Araújo, suku Lahane Osidentál, postu administrativu Vera Cruz, munisipiu Dili.

Jornalista: Nelson de Sousa/Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here