Komandante Jerál PNTL, Komisáriu Faustino da Costa. Imajen TATOLI/Egas Cristóvão

DILI, 07 juñu (TATOLI)–Komandu Polísia Nasionál Timor-Leste (PNTL) husu ba públiku atu kontinua tau konfiansa ba orgaun seguransa ne’e hanesan instituisaun Estadu ida ne’ebé iha dever atu serví no proteje povu.

“Ho akontesimentu sira ne’e, Komandu husu atu hotu-hotu tau nafatin fiar ba PNTL tanba Komandu sei halo esforsu haree situasaun sira ne’ebé falla iha pasadu no tenke hadi’a duni iha futuru,” Komandante Jerál PNTL, Komisáriu Faustino da Costa, hateten hafoin ramata reuniaun ho Primeiru-Ministru (PM) no Ministru Interiór, Taur Matan Ruak, iha Rezidénsia Farol, segunda ne’e.

Komandante Jerál ne’e dehan, aktu ne’ebé mak komete hosi membru PNTL konsidera hanesan pesoál no la reprezenta instituisaun.

“Aktu ne’e komete hosi oknum, la’ós instituisaun, tanba PNTL Estadu no povu tomak nian no Komandu sempre fó sai katak kor farda ne’ebé instituisaun iha ne’e, hanesan kor ruin ho ran hosi ema sira ne’ebé mate ba rai ida-ne’e nian,” Komisáriu Faustino da Costa tenik.

Tuir Komandante Jerál, aktu ne’ebé membru Polísia komete iha área Lahane to’o halakon ema na’in-rua nia vida no ema ida ho kondisaun grave, tenke simu konsekuénsia tuir lei ne’ebé vigora.

“Ami mai kedan ho palavra atu halo mudansa, koezaun ba instituisaun tenke halo, no ho akontesementu dala hirak hahú hosi Tasi-tolu, Taibesi, no Lahane, maka Komandu sei la tolera sé de’it, tantu membru ka Komandante mak falla implementa regra ne’ebé iha, tenke simu konsekuénsia,” Komisáriu Faustino da Costa subliña.

Notísia relevante: Família matebian husu MP prosesa lalais kazu Lahane ho sériu

Iha biban hanesan, Vise Ministru Interiór, António Armindo, hateten, PNTL kontinua hala’o knaar hodi serví povu tanba iha Konstituisaun hatuur katak dever instituisaun seguransa ne’e mak serví no proteje povu.

“PNTL kontinua hala’o servisu implementa lei no ordem, iha ema ida la fiar ne’e reprezeta individuu mak la fiar, instituisaun eziste nafatin, situasaun ne’ebé akontese tanba individuu mak halo hodi públiku lakon fiar ba PNTL. Instituisaun Estadu hambriik nafatin no ami kontinua mellora kapasidade membru sira, tanba ne’e povu tenke tau nafatin konfiansa ba institusaun ne’e hodi ita hotu tau hanoin hamutuk hodi dezenvolve instituisaun,” nia hatutan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here