Portavós Família Matebian, Bento Alberto Carlos. Imajen Tatoli/Arminda Fonseca.

DILI, 05 juñu 2021 (TATOLI)—Família matebian Mateus de Deus “Amino” ho nia-oan Camilio de Deus ne’ebé ajente seguransa tiru mate iha ohin madrugada iha Aldeia Ainitas-Hun Suku Lahane Orientál, Postu Administrativu Nain-Feto, Munisípiu Dili ne’e, husu ba Ministériu Públiku (MP) atu prosesa kazu refere ho lalais no sériu hodi bele hetan solusaun.

Notísia Relevante: Kazu Lahane, Komandu PNTL halo ona asaun prosedimentu dixiplinár no kriminál

“Ami husu Ministériu Públiku atu prosesa kazu ne’e ho sériu no lalais hodi bele hetan lalais nia solusaun tuir dalan legal, nune’e bele lori autór ba fatin ne’ebé merese nia hela bá. Tanba autór tiru mate ema ne’e krime, tanba ba dere ema-nia odamatan mak tiru mate ema,” Portavós Família Matebian, Bento Alberto Carlos, hateten ba jornalista sira liuhosi konferénsia imprensa ne’ebé hala’o iha Centro Nasionál Juventude Timor-Leste (CNJTL), Farol, Dili, sábadu ne’e.

Aktu no asaun ne’ebé mak ajente PNTL halo ne’e lamentável tebes hosi sosiedade Timor-Leste, tanba loloos ne’e ajente PNTL utiliza forsa no arma ne’ebé mak loloos ne’e atu asegura no proteje ninia povu no sosiedade hosi risku sira hotu, maibé uza arma hodi tiru mate fali nia povu.

Tanba ne’e, Ministériu Públiku tenke prosesa lalais kazu refere tanba matebian Mateus de Deus “Amino” la’ós hanesan ema baibain maibé nu’udár veteranu ida-ne’ebé uluk dedika aan luta ba Timro-Leste nia independénsia.

“Ida ne’e ami lamenta tebes ba iha ami-nia jornada moris ne’ebé ami husu ba Ministériu Públiku atu prosesa lalais suspeitu ajente PNTL ne’ebé mak uza arma hodi hatais sivíl ba asaltu komunidade iha kalan boot. Tanba ami nu’udár família nia haree, ladi’ak no hanoin asaun ida ne’e la reprezenta imajen di’ak PNTL ninian,” nia hateten.

Família matebian husu ba Komandu Jeral PNTL atu haree ajente polísia sira-ne’ebé daudaun ne’e servisu iha instituisaun PNTL nia laran ne’e, labele badinas politiza informasaun tuir ida-idak nia hakarak maibé haree ba realidade ne’ebé mak iha, sai ema ne’ebé mak profesionál hodi asegura nasaun no povu Timor-Leste.

“Komandu Jerál PNTL bainhira la haree didi’ak no la konsidera asuntu ida-ne’e ho sériu mak ajente PNTL sira sei nafatin kontinua halo asaun sira-ne’e hodi hamate ita-nia povu,” nia tenik.

Família matebian husu ba Governu liuhosi Minitériu Interior, Parlamentu nasionál, no ministériu relevante sira seluk, atu haree ba asuntu ne’e ho sériu, liu-liu ba Komandu Jerál PNTL hodi bele halo atusaun lalais ba ajente PNTL ne’ebé halo krime ne’e ho imediata no labele tolera ema pesoál ne’ebé atitude la di’ak iha instituisaun seguransa nia-laran.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here