Médiku-sira atende hela vítima kazu Lahane. Imajen Facebook.

DILI, 07 juñu 2021 (TATOLI)—Provedoria Direitu Umanu no Justisa (PDHJ sígla portugés), husu ba Komandu Jerál Polísia Nasionál Timor-Leste (PNTL), atu kumpre regra utilizasaun arma, tuir despaixu nº 290/CG-PNTL/IX/2016.

“Rekomenda ba Komandu Jerál PNTL, atu kumpre no implementa norma ba uza arma iha PNTL, hanesan despaixu nº290/CG-PNTL/IX/2016, pontu b, proibidu ka labele lori ka utiliza arma bainhira la hala’o serbisu polísia-nian, iha tempu folga, feriadu, lisensa saida de’it, tuir kursu, moras, partu etc, no pontu f kona-bá dezlokasaun serbisu bele utiliza arma bainhira iha órden serbisu, ne’ebé klaru hosi nia-Komandante ho asuntu serbisu polísia-nian,” Provedora, Jesuina Maria Maria Ferreira Gomes, hateten liu hosi konferénsia imprensa, iha edifísiu PDHJ, Caikoli, segunda ne’e.

Notísia relevante:Kazu Lahane, Komandu PNTL halo ona asaun prosedimentu dixiplinár no kriminál

PDHJ husu ne’e, relasiona ho kazu ajente PNTL (MJ) tiru sidadaun na’in-tolu iha oras la’ós serbisu, hodi hamate ema na’in-rua no hakanek ema ida iha uma, aldeia Ainitas-hun, suku Lahane Osidentál, 5 juñu 2021 madrugada tuku 1:45 otl, nu’udár prátika omisídiu no integridade fízika grave no violasaun ba direitu umanu.

Tanba ne’e, PDHJ rekomenda ba Komandante Jerál PNTL, atu halo regulamentu komplementár bazeia ba RJUF artigu 16, 17, 18, hodi kontrola no kesi reponsabilidade komandante PNTL munisípiu, Unidade, no mós serbisu-sira, atu implementa rigorozamente artigu 16 hosi RJUF, ba sistema guarda no kontrolu arma.

Bainhira la implementa, PDHJ husu Komandu Jerál tenke aplika medida ne’ebé deskreve iha artigu 17 nomós 18, bele aplika medida ne’ebé konsta ona iha Regulamentu Disiplinár PNTL.

Rekomendasaun seluk maka, Komandante Jerál tenke investiga no instaura prosesu disiplinár ba Komandante responsável másimu hosi ajente (MJ), ne’ebé la halo kontrolu ho másimu no efikáz ba ajente ne’e, hodi lori arma ba-nia uma fora hosi oras serbisu atu la kumpre norma ba uza arma iha PNTL, hanesan despaixu nº290/CG-PNTL/IX/2016.

Provedora, Jesuina Maria Maria Ferreira Gomes husu atu loke prosesu disiplinár no aplika medida kautelár nesesária, ba ajente polísia ho inisiál MJ, hodi garante suspensaun ba ezersísiu funsaun-sira, to’o konkluzaun prosesu disiplinár.

“PDHJ husu Komandante Jerál PNTL atu loke prosesu disiplinár no aplika medida kautelár nesesária ba ajente MJ, hodi garante suspensaun ba nia ezersísiu funsaun to’o konklui prosesu disiplinár, tuir artigu 70º hosi Dekretu-Lei 44 /2020, 7 outubru kona-bá Regulamentu Disiplinár PNTL,” Maria Maria Ferreira Gomes, husu.

Tuir relatóriu monitorizasaun urjente ne’ebé PDHJ hala’o katak, faktu iha 5 juñu 2021 madrugada tuku 1:45 otl, akontese problema entre ajente PNTL (MJ) nia oan mane ho matebian (C) iha fatin izolamentu ospitál militár Lahane-nia kotuk.

Problema ne’e konsege rezolve hosi xefe joventude no xefe aldeia, maibé liu minutu balun, membru polísia na’in-haat hosi eskuadra Na’in-Feto to’o fatin akontesimentu no suspeitu mós hamutuk nia-oan mane no kaben to’o iha fatin akontesimentu iha ospitál Lahane.

Provedora ne’e hatutan, ajente PNTL (MJ) la’ós iha oráriu serbisu nia-laran, tanba hatais kalsa badak ho kamizola singlet ida no sikat pistola iha kanotak ba buka (C) iha vítima-sira nia uma, iha aldeia Ainitas-hun, suku Lahane Osidentál.

Relatóriu ne’e deskreve mós katak, ajente ne’e uza arma hodi halo krime no viola direitu sidadaun ba moris no integridade fízika, hamate ema na’in-rua (aman no oan) no hakanek ema ida nu’udár manefoun hosi vítima.

PDHJ konsidera Estadu iha obrigasaun pozitiva atu garante indivídu hotu-hotu, sira-nia direitu ba moris no ba integridade pesoál, nune’e bele hetan tratamentu ho umanidade no ho respeitu ba dignidade hanesan ema umana, tuir termu hosi artigu 9º, 23º, 29º, 30º nº 4, hosi Konstituisaun Repúblika Demokrátika Timor-Leste ne’ebé konsagra katak, Timor-Leste vinkuladu hodi kumpre Konvensaun-sira ne’ebé ratifikada.

“Nune’e, interpretasaun tenke bazeia ba Deklarasaun Universál Direitu Umanu, konforme artigus 6º no 7º Paktu Internasionál kona-bá Direitu Sivíl no Polítiku, ratifikadu hosi Rezolusaun Parlamentu Nasionál nº3/2003,” subliña.

Kazu ida ne’e sujeita ba responsabilidade kriminál-sira tuir Kódigu Penál Timor-Leste no mós sujeita ba responsabilidade disiplinár tuir artigu 17º no 18º Rejime Jurídiku Uzu Forsa (RJUF), ne’ebé estabelese katak, uzu forsa ne’ebé la hó loloos ka individu mak sujeita ba responsabilidade kriminál no disiplinár, PDHJ sei uza inisiativa hodi loke prosesu investigasaun ba kazu violasaun direitu umanu no violasaun governasaun di’ak ba akontesimentu ida-ne’e.

Tenke investiga ajente PNTL na’in-haat

PDHJ husu PNTL tenke investiga no loke prosesu disiplinár ba ajente na’in-haat ne’ebé tuir faktu la halo atuasaun ruma hasoru suspeitu, hodi prevene krime ne’e, tuir artigu 52º kódigu Prosesu Penál mak estebelese katak, ajente PNTL-sira iha kompeténsia hodi uza nia inisiativa-rasik atu impede prátika krime.

“Ajente na’in-hat ne’ebé marka prezensa iha fatin akontesimentu la halo prevensaun, haree no nonok de’it, la tuir bá hodi prevene krime ne’e,” Jesuina Maria Maria Ferreira Gomes, esklarese.

Ezijénsia ne’e tanba tuir relatóriu PDHJ, faktu hatudu katak, ajente PNTL na’in-haat ne’ebé besik iha fatin akontesimentu la halo asaun no husik de’it krime ne’e akontese.

Bazeia ba faktu ne’e, PDHJ konsidera ajente ne’e viola ona devér jerál no espesiál previstu iha Regulamentu Disiplinár PNTL no halo omisaun ka violasaun direitu umanu indireta.

Presiza reforma institusionál

PDHJ rekomenda ba Governu atu halo reforma ba instituisaun PNTL, nune’e bele serbí di’ak liu tán povu.

Jesuina Maria Maria Ferreira Gomes, hateten Ministéiru Interiór ho instituisaun PNTL presiza halo asesmentu ida hodi identifika instituisaun PNTL agora iha ne’ebé, atu ba ne’ebé no oinsa to’o iha ne’ebá.

“Ida ne’e bele halo liu hosi reforma instituisionál, hanesan prosesu ida hodi halo revizaun no restruturasaun, kulturál, administrativa, rekursu umanu, formasaun no responsabilidade polisiál hanesan akuntabilidade ho transparánsia,’’ nia hateten.

Reforma instituisionál koa’lia kona-bá reforma estrutura, enkuantu reforma regulamentu haree liu bá orgánika no reforma kulturál maka liga jestaun kontrolu, lideransa, administrativa ba promosaun karreira ho avaliasaun, inklui reforma rekursu mak hanesan presija treinamentu no fasilidade.

Antes ne’e, Komandante Operasaun Nasionál PNTL, Superintendente Xefe, Pedro Belo deklara ona katak, Komandu Jerál halo ona asaun prosedimentu dixiplinár no kriminál ba ajente polísia ne’ebé hanesan autór ba akontesimentu ne’e, no seidauk konklui.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here