Diretora Ezekutiva Fundu Dezenvolvimentu Kapitál Umanu (FDCH), Lelia Carceres dos Santos. Imajen/Osória Marques.

DILI, 07 juñu 2021 (TATOLI) – Diretora Ezekutivu Fundus Dezenvolvimentu Kapitál Umanu (FDCH, sigla portugés), Leila Cárceres dos Santos, informa tinan-ne’e FDCH prevee orsamentu $100.000 hodi apoiu subsídiu individuál ba estudante universitáriu finalista-sira iha rai-laran no iha diaspora  (rai-li’ur).

Notísia Relevante : 2021, FDCH prioritiza bolsa estudu ba Timor-oan

Leila Cárceres dos Santos klarifika subsídiu individuál sempre akontese kada tinan ba sira ne’ebé mak la hetan oportunidade iha tinan ida ne’e bele prepara fali proposta ba tinan oin no FDCH simu proposta hosi estudante finalista rai-laran no rai-li’ur hamutuk 10.000-resin, maibé bainhira hatama fali iha sistema proposta barak mak inválidu signifika la kompletu.

“FDCH hahú simu proposta subsídiu individual hosi estudante finalista iha rai-laran ho rai-li’ur nian, hahú iha 18 janeiru to’o 18 fevereiru 2021 hamutuk 10.89, maibé halo fali verifikasaun konsege tun ba 5.000-resin no  kuandu verifika fali konsege hetan dokumentu kompletu hamutuk 3.025,” Leila Cárceres dos Santos informa ba jornalista-sira iha Dili, segunda ne’e.

Nia profunda tan, orsamentu  $100.000 ne’e FDCH prevee hodi apoiu subsídiu ba estudante 3.025 no 1.975 la pasa ho razaun dokumentu dobru no dokumentu balun laiha aneksu.

Diretora FDCH ne’e afirma katak estudante finalista ne’ebé dokumentu la kompletu sira hatama kedan iha observasaun atu estudante sira bele asesu parte ne’ebé maka dokumentu la kompletu. Bá sira ne’ebé mak dokumentu válidu, FDCH husu estudante finalista-sira bele aprezenta dokumentu orijinál bá universidade atu ekipa FDCH hamutuk ho universidade bele verifika filafali.

Estudante finalista iha rai-li’ur, FDCH kontinua halo komunikasaun e-mail ho universidade-sira hodi hetan justifikasaun ba kredibilidade dokumentu, inklui nota estudante nian. Enkuantu tabela subsídiu individuál estudante-sira nian, FDCH hatuur ona valór orsamentu tuir grau nivel akadémiku.

Estudante finalista iha rai-laran hahú husi Lisensiatura sei hetan $500, mestradu hetan $650 no doutoramentu hetan $1.000. Bá estudante rai-li’ur ka diaspora depende ba kustu da vida kada nasaun.

Maske lista subsídiu individuál estudante nian haruka ona ba universidade-sira, maibé prosesu pagamentu ba estudante seidauk realiza tanba sei iha difikuldade ho pandemia COVID-19 ba prosesu ensinu aprendizajen prejensiál iha universidade-sira.

“Bainhira aula prejensiál iha universidade-sira la’o normál ona,  FDCH sei tau anunsia atu estudante bele asesu ba pagamentu,”  Leila Cárceres dos Santos hateten.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here