Logotipu FDCH

DILI, 11 dezembru 2020 (TATOLI)–Parlamentu Nasionál aprova iha faze espesialidade alokasaun orsamentu tinan fiskál 2021 ba  Fundu Dezenvolvimentu Kapitál  Umanu (FDCH)  ho montante $12,995,000 ne’ebé fó prioridade ba kapitál sosiál liuliu  bolsa estudu ba timor-oan.

Hosi totál orsamentu ne’e  aloka  ba bens no servisu atu prioritiza programa haat hanesan programa formasaun profisionál $1,077,800, programa treinamentu tékniku $3,146,452, programa bolsa estudu  $7,764,215 no programa seluk ho tipu formasaun $1,006,533.

Liuhosi debate OJE 2021 iha faze espesialidade, ohin, membru PN sira aprova alokasaun orsamentu ba FDCH ho votu a-favór 42, kontra 0 no abstensaun 0.

Iha OJE 2021, FDCH fó prioridade ba bolsa estudu nu’udar kontinuidade hosi liña ministeriál no bolseiru foun mai hosi Ministériu Ensinu Superiór  ba kbiit  laek nia oan sira ho “bolsa hakbiit” no bolsa estudu ba dosente privadu no públiku sira.

 Maski ho situasaun surtu COVID-19 labele haruka ba rai li’ur, maibé FDCH hala’o planu ano zero iha rai laran.

Ba kapitál sosiál no reforsa institusionál, orsamentu alokadu boot liubá bolsu estudu ho montante $7,764,215, ne’ebé ekivalente ho 59,7%  hosi totál orsamentu FDCH nian.

Programa bolsa estudu  atu aumenta koñesimentu no abilidade akadémika nian hodibele kontribui  ba dezenvolvimentu ekonomia.

To’o tinan ne’e, benefisiáriu ba bolsa estudu hamutuk 1.154 no meta iha 2021  atu forma tan bolseiru 2.345 kompostu hosi feto na’in-1.115 no mane  na’in-1.230.

Iha 2021, FDCH  iha sub-programa 21 no totál atividade 59, ne’ebé númeru benefisiáriu hamutuk 19.873,  kompostu hosi feto na’in- 9.913 no mane  na’in- 9.760.

Ba formasaun profisionál atu hasa’e abilidade juventude sira hodi bele responde ba nesesidade indústria no merkadu traballu iha Timor-Leste, jere hosi Sekretáriu Estadu Profisionál no Empregu (SEFOPE) iha área formasaun lian Korea no Inglés iha Dili no Rejiaun Administrasaun Espesiál Oé-Cusse  Ambeno (RAEOA).

Tuir relatóriu 2019, iha área formasaun profisionál konsege forma ona joven hamutuk 5.044 no meta atu forma tan benefisiáriu hamutuk 2.872, kompostu hosi feto na’in-672 no mane  na’in-2.186.

Nune’e mós kontinua formasaun tékniku atu dezenvolve kapasidade funsionáriu públiku hodibele mellora di’ak liután prestasaun servisu iha ajente administrasaun públiku nian, formasaun ba área judisiáriu no formasaun ba profesór sira iha lian portugés.

Funsionáriu ne’ebé sai benefisiáriu formasaun téknika hamutuk 4.482 ho meta atu fó formasaun tan 16,890, kompostu hosi feto na’in-8.364 no mane  na’in-8.526.

Hahú 2011 to’o outubru 2020, FDCH liuhosi programa formasaun profisionál, forma ona joven 32.678, ba programa formasaun tékniku ne’ebé benefisiáriu hosi funsionáriu públiku hamutuk 32.688,  ba programa bolsa estudu 5.266 no programa formasaun tipu seluk hamutuk 11.295.

 Programa bolsa estudu liuliu estudante sira ne’ebé sei ativu to’o agora hamutuk 1.151 no sira ne’ebé gradua ona purvolta 3.848 no kanseladu ho razaun mate 267.

Jornalista   : Florencio Miranda Ximenes

Editór        : Francisco Simões