Ambulánsia ida ne’ebé ho kondisaun avaria, para hela iha Ospitál Referál Maliana. Imajen/António Gonçalves.

BOBONARO, 07 juñu 2021 (TATOLI)—Sala Situasaun, Sentru Integradu Jestaun Krize (SIJK), munisípiu Bobonaro, transfere pasiente pozitivu feto ida idade 76 ho elikópteru ba izolamentu Verra Cruz, tanba sofre moras raan midar no pnoeumonia grave.

“Pasiente ne’e ho moras seluk ne’ebé grave, entaun tenke halo tratamentu iha Vera Cruz,” Koordenadór Pilár hitu, munisípiu Bobonaro, João Barreto Cardoso, hateten ba jornalista Agência Tatoli iha Maliana, segunda ne’e.

Notísia relevante:PAM Bobonaro agradese ba matebian ‘Mau-fatuk’

João Barreto Cardoso hateten, ekipa saúde halo ona Contact tracing ba família ne’ebé durante ne’e halo kontaktu ho pasiente hodi hein rezultadu teste swab.

Koordenadór ne’e husu komunidade labele pániku, maibé mantein kumpre protokolu Organizasaun Mundiál Saude (OMS) hanesan uza máskara, fase liman bebeik ho sabaun, no distansiamentu sosiál.

Dadus COVID-19 iha munisípiu Bobonaro, pozitivu 33, rekoperadu na’in-lima no hahú janeiru to’o 06 juñu, komulativu kazu iha 190.

Pozitivu na’in 33 ne’e, na’in 22 iha izolamentu Mota-ain, na’in-lima iha otél Maliana,  no na’in-neen auto izolamentu iha uma.

Entretantu dadus nasionál, ohin, SIJK rejista kazu pozitivu 24, rekoperadu 194 no kazu ativu 2.232.

Autoridade identifika otél haat ba izolamentu

Nune’e mós Prezidente Autoridade Munisípiu Bobonaro hanesan mós responsável ba Forsa Tarrefa Prevensaun no Mitigasaun, Jeferino Soares dos Santos, hateten SIJK Bobonaro identifika ona otél haat atu halo izolamentu ba pasiente COVID-19.

Nia dehan, prosesu identifikasaun ba otél rua iha Maliana no rua iha Atabae ne’e atu antesipa, bainhira akontese transmisaun makaas iha munisípiu ne’e, bele akumula pasiente-sira.

Tuir planu, SIJK Bobonaro sei halo mós reablitasaun ba antiga Ospitál tuan Maliana, ba fatin izolamentu iha tempu badak, hodi hein finalizasaun sentru izolamentu ne’ebé sei iha faze konstrusaun.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here