Molok haloot, familía lori mate-isin Alfredo Martins ‘Mau-fatuk’, hala’o vizita ikus ba fatin serbisu iha edifísiu administrasaun munisipál Bobonaro, sábadu (05/06/21). Imajen Tatoli/ Sérgio da Cruz.

BOBONARO, 06 juñu 2021 (TATOLI)—Prezidente Autoridade Munisípiu (PAM) Bobonaro, Jeferino Soares dos Santos, agradese ba matebian Alfredo Martins ‘Mau-fatuk’, nu’udár xefe depertamentu Saneamentu munisipál, ne’ebé hakotu-iis iha izolamentu Vera Cruz, Dili, sesta (04/06).

Sentidu agradesimentu ne’e PAM Bobonaro hato’o bainhira hamutuk ho funsionáriu-sira presta omenajen ikus iha serimónia funerál ba mate-isin, ne’ebé hala’o iha semitériu Santa Cruz Maliana, sábadu (05/06).

Notísia relevante:COVID-19: óbitu ida, rekoperadu 167 no ativu 2.501

“Ami agradese ba matebian-ninia dedikasaun tomak ne’ebé serbisu ho responsabilidade no la ezije buat-ruma ba autoridade ho superiór-sira,” Jeferino Soares dos Santos, agradese.

Hanesan autoridade munisipál, Jeferino Soares dos Santos sente triste tanba lakon duni funsionáriu di’ak ida ne’ebé dedikadu ba serbisu saneamentu Bobonaro.

“Hanesan xefe depertamentu saneamentu, matebian hale’u munisípiu tomak ho programa ‘Moris Saudavel’ no husik hela buat barak iha tinan barak-nia laran. Ida-ne’e mak ami sente lakon tebes,” nia hateten.

Iha fatin hanesan reprezentate família, Domingos Martins, husu Komisaun Omenajen atu tau matan ba faluk no oan-ki’ak sira, tanba matebian mós sakrifika an ba luta libertasaun nasionál.

“Ami família hakarak hato’o de’it ba Komisaun Omenajen, atu tau matan ba faluk no oan-ki’ak sira tanba matebian mós kontribui makaas ba independénsia rai ida-ne’e,” Domingos Martins, husu.

Matebian Alfredo Martins ‘Mau-fatuk’ moris iha aldeia Pipgalak, suku Tapo-Memo (02/10/73) hosi inan Esperança Bui-bere no aman Cândido Pinto Tilman.

Iha 1984 matebian hahú eskola Primária iha suku Lepal-Ames Lolotoe, 1987 kontinua eskola Pré-Sekundária I Maliana, 1990 iha Sekundária Dom Martinho da Costa Lopez Maliana, 1994 tama Universitas Timor-Timur (UNTIM) Dili, 1998 livre teoria no lisensiadu iha 2007.

Involvimentu iha luta

Tinan 1995 matebian hahú envolve  iha Frente Klandestina  hanesan Vise Responsábel ba Dewan Solidaritas Mahasiswa Pemuda dan Pelajar Timur-Timur.

Tinan 1996, hafoin Komferénsia Triparti, matebian tuir konferénsia Serikat Mahasiswa iha Denpasar Bali, Indonézia.

Hahú hosi-ne’e, matebian dedika an tomak hodi organiza estudante timoroan-sira liu hosi Himpunan Pelajar Mahasiswa Kabupaten Bobonaro to’o Timor-Leste restaura Independénsia.

Hakotu-iis ho COVID-19

Matebian hakotu-iis ho COVID-19 iha izolamentu Vera Cruz ho idade 48, husik-hela kaben no oan na’in-haat, mane rua no feto rua.

Sala Situasaun, Sentru Integradu Jestaun Krize (SIJK), rejista matebian nu’udár timoroan ne’ebé hakot-iis ho COVID-19 iha 04 juñu 2021.

Istória moras hosi matebian, iha 27 maiu 2021 ba Hospitál Referénsia Maliana (HRM), tanba iis-boot no me’ar ho isin-manas durante loron haat antes, ne’ebé iha mós istória diabetes ho tensaun aas.

Iha HRM halo teste PCR, deteta pozitivu ho CT N2gene24,5 no Egene 22,7, nune’e enkamiña, iha loron ne’e kedan ba izolamentu Vera Cruz, ho diagnoze traballu Pneumonia grave tanba COVID-19.

Durante iha Vera Cruz halo tratamentu tuir protokolu ne’ebé iha, inklui terapia ho oksijéniu liuhosi ventilasaun asistida ho CPAP1.

Iha 31 maiu, ekipa médika deside halo (CPAP) Continous Positive Airway Pressure. Ventiladór naun-invazivu ne’ebé ajuda ema dada-iis di’ak-liu, bainhira pulmaun la funsiona di’ak hodi simu oksijéniu (O2) no hasai dióksidu karbonu (CO2). Intubasaun hodi liga ba ventiladór no nafatin fó tratamentu sira seluk.

Maski nune’e, iha 04 juñu dader matebian iis-kotu tanba respiratory failure ka fallansu respiratóriu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here