Diretór Serbisu Saúde Munisípiu Bobonaro, João Baptista Mau Cardoso, simu vasina iha Ospitál Referál Maliana. Imajen/Médiku, Jerónimo de Sousa.

DILI, 26 abríl 2021 (TATOLI)—Serbisu Saúde Munisípiu Bobonaro remata ona vasina AstraZeneca ba pesoál liña frente hamutuk 1.292, iha kinta 22 abríl tinan ne’e.

Diretór Serbisu Saúde Munisípiu Bobonaro, João Baptista Mau Cardoso, hateten totál pesoál liña frente iha Munisípiu ne’e hamutuk 1.292, no maioria hetan hotu ona vasina tanba botir ida vasina ba ema na’in 12.

Notísia relevante:Pesoál liña frente 1.080 simu ona vasina AstraZeneca

Iha membru Polísia Nasionál Timor Leste (PNTL) hosi Komandu Munisípiu Bobonaro na’in 38 mak la vasina tanba vasina hotu ona.

“Sira na’in 38 mak la simu vasina, balun lakohi simu no balun hakarak duni atu vasina maibé vasina la to’o,’’ João Baptista Mau Cardoso hateten ba jornalista Agência Tatoli via telefónika, segunda ne’e.

Durante imunizasaun iha Munisípiu Bobonaro, ekipa saúde tun direta ba iha edifísiu  FALINTIL Forsa Defeza Timor Leste (F-FDTL), Serbisu Imigrasaun, Serbisu Água no Saneamentu (SAS), Elitrisidade Timor Leste (EDTL), PNTL no atividade ne’e remata ona iha 22 abríl, tanba vasina mós hotu ona.

Iha faze dahuluk ne’e, pesoál saúde hotu-hotu hetan vasina no tuir planu, iha segunda faze mak sei fó ba sira ne’ebé moras krónika inklui sira ne’ebé idade 60 ba leten.

“Vasina ne’ebé Minsitériu Saúde distribui mai ne’e ami fó ba pesoál liña frente de’it no membru PNTL mak balun la hetan,’’ nia subliña.

Tabela distribuisaun hosi Serbisu Autónomu Medikamentu no Ekipamentu Saúde (SAMES)  ba distribuisaun AstraZeneca doses 24.000 faze dahuluk mak hanesan, Munisípiu Aileu hetan doses  590,  Ainaro 690, Baucau1.730, Bobonaro 1.080, Covalima 920, Dili hetan 13.190, Ermera 900, Lautém 740, Liquiça 620, Manatuto 590, Manufahi 680, Viqueque 910 no RAEOA 1.360.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here