Mate-isin Mateus de Deus ho oan mane Camilio de Deus, iha hela mate-uma Lahane, domingu (06/06/21). Imajen facebook.

DILI, 06 juñu 2021 (TATOLI)—Organizasaun Rezisténsia Hadomi FRETILIN (ORHF), husu Governu liuhosi Ministériu Interiór (MI), atu halo reforma ba instituisaun Polísia Nasionál Timor-Leste (PNTL), nune’e hadi’a atitude membru-sira bele serbí povu ho di’ak.

Ezijénsia ne’e ORHF hato’o, relasiona ho asaun ne’ebé membru polísia ida ho inisiál MJ halo iha trajédia Ai nitas-hun, Lahane, uza arma hodi hamate Mateus de Deus ho oan mane Camilo de Deus, inklui hakanek vítima ida-seluk, iha sábadu (05/06/21) madrugada.

Notísia relevante:Kazu Lahane, Komandu PNTL halo ona asaun prosedimentu dixiplinár no kriminál

ORHF konsidera situasaun ne’e nu’udár aktu brutalizmu hosi pesoál polísia ne’ebé tuir loloos labele akontese, tanba arma ne’ebé seguransa-sira uza atu asegura la’ós atu óho povu.

“Husu atu halo reforma ho urjénsia, hodi hadi’a instituisaun no atetude membru tomak-nian, nune’e serbí di’ak liu tán povu tuir lema PNTL katak, Servir e Proteger” ORHF haktuir liu hosi komunikadu ne’ebé Agência Tatoli assesu, domingu ne’e.

ORHF husu ba autoridade kompetente atu halo investigasaun kle’an hodi prosesa kazu ne’e tuir dalan justisa no imparsiál, tanba matebian mós hanesan vateranu ida ne’ebé fó an tomak ba libertasaun rai ida-ne’e.

Parte ORHF hato’o solidariedade no profunda sentidu kondolénsia ba família enlutada ne’ebé oras ne’e iha hela situasaun triste.

Horisehik, Komandante Operasaun Nasionál PNTL, Superintendente Xefe, Pedro Belo deklara ona katak, Komandu Jerál halo ona asaun prosedimentu dixiplinár no kriminál ba ajente polísia ne’ebé hanesan autór ba akontesimentu ne’e, no seidauk konklui.

Jornalista: Arminda Fonseca

Editór: Cipriano Colo

HAKEREK NO HATÁN

Please enter your comment!
Please enter your name here