Komandante TLPDP, Daree Booy entrega komputadór sanulu no fasilidade seluk-tán ba Komandante Jerál PNTL, Komisáriu Polísia, Faustino da Costa, sesta (04/06/21). Imajen/PNTL.

DILI, 04 juñu 2021 (TATOLI)—Polísia Nasionál Timor Leste (PNTL), liu hosi Komandante Jerál, Komisáriu Polísia, Faustino da Costa, hato’o agradesimentu ba parseiru Timor Leste Police Development Programme (TLPDP), ne’ebé fó apoiu komputadór sanulu no fasilidade serbisu-sira seluk ba instituisaun seguransa ne’e.

Komisáriu Faustino da Costa, esplika komputadór sanulu ne’e sei utiliza atu substitui hikas fasilidade-sira ne’ebé hetan estragu hosi inundasaun, iha 04 abríl tinan ne’e.

Notísia relevante:TLPDP apoia formasaun lian Ingles ba UEP hodi prepara ba misaun paz iha ONU

Nune’e mós Komandante Komandu Administrasaun PNTL, Superintendente Xefe Polísia, José Soares, konsidera apoiu ne’e importante tanba durante inundasaun, fasilidade barak hetan estragu no difikulta tebes serbisu administrasaun instituisaun-nian.

“Ita agradese, tanba ita-nia parseiru TLPDP agora fó ona komputadór sanulu kompleta ho mákina impresora-fotokopia, no mós meza sanulu ho kadeira 25,” José Soares, hateten ba jornalista-sira iha Komandu Jerál, Caicoli, sesta ne’e.

Tuir planu, ekipamentu hirak-ne’e sei distribui ba seksaun PSDO, Gabinete Asesoria Jurídiku, Relasaun Públika, Departamentu Finansa, Serbisu Investigasaun Kriminál, Unidade Tránzitu, Aprovizionamentu, Serbisu Informasaun Polísia (SIP) inklui departamentu ho seksaun ne’ebé presija.

TLPDP nu’udár parseiru prinsipál PNTL ne’ebé sempre apoia instituisaun seguransa ne’e, dezde tinan 2000 liu hosi kapasita rekursu umanu iha área oi-oin, apoia ekipamentu no formasaun lideransa.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here