Komandu Jerál PNTL no Timor-Leste Police Development Program (TLPDP) entrega sertifikadu ba Ofisiál Superior Unidade Espesiál Polísia (UEP) na’in-24 ne’ebé tuir kursu lian Ingles. Imajen Tatoli/Eugénio Pereira

DILI, 10 novembru 2020 (TATOLI)–Governu Austrália liuhosi parseiru Timor-Leste Police Development Program (TLPDP) kontinua ajuda formasaun lian Ingles ba membru Unidade Espesiál Polísia (UEP) na’in-24 hodi prepara sira envolve iha misaun paz Organizasaun Nasoins Unidus (ONU).

Notísia Relevante : PNTL ho TLPDP ko’alia koordenasaun programa servisu 2020-2026

Kursu lian Ingles  ne’e  parte TLPDP servisu hamutuk ho Organizasaun Science of Life and System (SOLS) maka fasilita formasaun ba membru UEP sira hahú iha janeiru 2020  no termina ohin hodi simu sertifikadu apresiasaun.

Segundu Komandante TLPDP, Mark Silvertand dehan, kursu Ingles ne’e importante ba membru sira hodi aumenta sira-nia koñesimentu iha lian Ingles atu bele fasilita sira-nia komunikasaun bainhira hetan fiar atu reprezenta Timor-Leste iha misaun ba paz ONU nian iha futuru.

Nia dehan, TLPDP sente orgullu tebes, kursu ne’e hahú partisipa direita hosi Komandante UEP no membru sira barak maka uza tempu hodi aprende ko’alia Ingles ho di’ak.

Tuir nia katak, kursu ne’e la’o mezmu la’o paradu uitoan, tanba problema surtu COVID-19 ne’ebé akontese iha mundu no Timor-Leste, maibé membru UEP sira hatudu nafatin sira nia dixiplina hodi tuir kursu.

“Lian Ingles ne’e lian internasionál no importante atu forma ita boot sira sai polísia ida bele hola parte iha misaun internasionál sira hanesan misaun treinamentu sira ba Portugál. Treinamentu ne’e hanesan ezemplu ida hosi kompromisu servisu apoiu TLPDP hodi apoia PNTL ba oin tuir planu sei to’o 2026,” Segundu Komandante TLPDP, Mark Silvertand  hateten bainhira ensera formasaun ne’e iha  salaun Formasaun UEP, Bairru-Pité, Dili.

TLPDP sei ajuda nafatin Komandu PNTL iha área importante sira hanesan konstrusaun fasilidade treinamentu, no kursu báziku kolokasaun kurríkulu no seluk tan.

Treinamentu ne’e sei liga ba abilidade espesífiku hodi haree liubá nesesidade komunidade nian no envolvimentu PNTL nian iha komunidade hodi garante paz.

Iha fatin hanesan, Komandante UEP, Superintendente Xefe, Orlando Gomes ne’ebé partisipa mós iha kursu ne’e, orgullu tebes tanba bele aprende nafatin lian Ingles ho di’ak.

Nia husu ba membru sira atu kontinua tuir kursu lian Ingles hodi bele fó kontribuisaun ba dezenvolvimentu Instituisaun PNTL.

Segundu Komandante PNTL, Komisáriu Mateus Fernandes. Imajen Tatoli/Eugénio Pereira

Segundu Komandante PNTL, Komisáriu Mateus Fernandes hato’o agradese ba parseiru TLPDP ne’ebé fó apoiu formasaun ba membru UEP.

Nia dehan, Ingles ne’e nu’udar lingua internasionál ne’ebé presiza tebes membru sira atu hatene hodi halo komunikasaun di’ak liután.

“Kursu lian Ingles ida-ne’e hatudu rezultadu ida di’ak tebes, la’ós  tanba sira hetan sertifikadu ne’e. Maibé tanba sira hotu pratika ko’alia Ingles la’ós de’it iha klase, maibé iha uma, iha sosiedade sira bele ko’alia, tanba Ingles hanesan bukae ida ita nia parseiru fó ba PNTL,” nia hateten.

Komisáriu Polísia, Mateus Fernandes husu atu TLPDP kontinua fó  formasaun iha futuru hodi aumenta membru hotu nia koñesimentu iha área lian Ingles no Portugés.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here