Ministru Ensinu Superiór, Siénsia no Kultura (MESSK), Longuinhos dos Santos. Imajen Tatoli/Egas Cristóvão

DILI, 04 juñu 2021 (TATOLI) – Ministériu Ensinu Superiór, Siénsia no Kultura (MESSK) hamutuk ho Sekretáriu Estadu Arte Kultura (SEAK),  inklui instituisaun autónomu sira ne’ebé  tutela ba MESSK, sesta ne’e,  hahú diskute ona programa prioridade hodi define iha proposta Orsamentu Jerál Estadu (OJE) 2022.

Notísia Relevante : Estudante 64.466 sei hetan izensaun propina

Ministru Ensinu Superiór, Siénsia no Kultura (MESSK), Longuinhos dos Santos, relata katak asuntu pertinente iha diskusaun ne’e mak atu define programa prioridade. Inklui sub-programa no atividade-sira no orsamentu hira mak atu koloka iha OJE 2022.

Órgaun ka instituisaun autónomu ne’ebé tutela ba MSSK maka hanesan ANAAA (Agência Nacional para a Avaliação e Acreditação Acadêmica), INCT (Instituto Nacional de Ciência e Tecnologia), Universidade Nasionál Timor Lorosa’e (UNTL), IPB (Instituto Politécnico Betano) ho Fundu Dezenvolvimentu Kapitál Umanu (FDCH).

“Ami halo diskusaun ne’e atu deside orsamentu hira mak sei koloka ba MESSK, SEAK inklui ANAAA, INCT UNTL, IPB no FDCH iha OJE 2022, maibé tenki bazeia ba dezempeña ezekusaun OJE 2021 nian” Ministru Longuinhos dos Santos, informa ba jornalista-sira iha Dili.

Nia akresenta katak programa prioridade iha 2021 hamutuk haat mak hanesan programa nasionál ba UNESCO, programa diseminasaun arte no kultura Timor-Leste nian, programa boa Governasaun institusionál no ensinu superiór nian, maibé 2022 ministériu utiliza de’it programa prioridade tolu tanba hasai tiha programa nasionál ba UNESCO.

Progresu ezekusaun OJE 2021 nian, tuir Ministru Longuinhos katak MESSK konsege ezekuta ona orsamentu 30% inklui mós obligation no kompromisu.

Jornalista  : Tomé Amado

Editór        : Francisco Simões

 

HAKEREK NO HATÁN

Please enter your comment!
Please enter your name here