Prezidente Komisaun A PN, Joaquim dos Santos, Imajen Tatoli/António Gonçalves

DILI, 04 maiu 2021 (TATOLI)—Komisaun A ne’ebé trata asuntu Justisa no Konstitusionál sei tetu paresér hosi Komisaun Nasionál Eleisaun (CNE-sigla portugés) kona-ba projetu-lei eleisaun munisipál tanba CNE nia kompeténsia halo supervizaun de’it.

Notísia Relevante: CNE identifika frakeza balun iha projetu-lei eleitorál munisipál

Prezidente CNE, Alcino Baris aprezenta paresér balun kona-ba projetu-lei eleisaun munisipál ne’e iha frakeza balun, katak kritéria eleisaun Kámara Munisipal uza métodu D’Hont no bareira 3%, maibe tuir CNE nia hanoin katak bareira tenke hatún ba 2%, atubele fó oportunidade mós ba partidu kiik sira hodi hetan reprezentante iha munisípiu.

Hatán ba paresér ne’e, Prezidente Komisaun A, Deputadu Joaquim dos Santos esplika, bareira ba kandidatu sira iha munisipál ne’e nu’udar lejizladór bazeia prinsípiu kualidade ne’e la’ós bazeia ba prinsípiu kuantidade.

“Tanba ita hakarak harii Estadu ida ho reprezentasaun kualidade, quanto mais ninia bareira ne’e aas entaun ezijénsia ne’e mós aas. Quanto mais nia bareira ne’e kiik ezjijénsia ba kualidade mós tuir ida-ne’e, ne’ebé ita la defende prinsípiu kuantidade,”  Prezidente Komisaun A informa ba jornalista sira, iha resintu Parlamentu Nasionál, sesta ne’e.

Nia dehan, ema barak hakarak sai deputadu maibé hakarak hetan deputadu ne’ebé kualidade nune’e hala’o serbisu ho kualidade iha munisípiu.

Tanba,  tuir nia, lei ne’e desentraliza podér ba Prezidente Kámara no Prezidente Asembleia ho nia membru sira atu foti desizaun ruma tenke hatene ona vantajen no dezvantajen sira, labele hein fali ema seluk haruka mak foti desizaun tanba ida-ne’e mak konseitu kualidade hanesan ne’e.

“Tanba ne’e mak nasionál 3%, ne’e mós ita sei sukat. Partidu barak loos no 3% mós nia unsur kualidade mós seidauk tuir ita-nia hakarak. Maibé tún ba iha munisipál númeru eleitorál ne’e komesa kiik uitoan. Partidu polítiku mós ladún barak, entaun iha-ne’e mak ajuda ita prodús deputadu ho kualidade. Se  mantein 3% ba munisipál ne’e razoavel nune’e hetan deputadu ne’ebé ho kualidade,” nia dehan. 

Nia dehan, 3% ba ba partidu polítiku sira atu tau lista kandidatu mós tenke hanoin ona nune’e koñese nia povu, povu mós tenke koñese ninia kandidatu ba deputadu.

“Kona-ba paresér CNE nian 2% ne’e mós di’ak maibé tuir ami-nia hanoin ne’e fó liu atu hetan partisipasaun ne’e la nesesáriu (belum tentu) hosi ema barak ne’e prodús ema ho kualidade. La nesesáriu ema-ne’ebé partisipa ho númeru kiik ne’e, nia serbisu laiha kualidade,” nia dehan.

Kritéria sira mós hanesan depende ba konstestuál, maibé labele inventa fali kritéria ne’ebé la kondiz ho realidade, tanba prinsípiu atu halo lei mak dehan nune’e.

Paresér seluk ne’ebé CNE propoin mak lista kandidatura sira aprezenta ba Supremu Tribunal Justisa, maibé tuir CNE nia observasaun katak prosesu ne’e nudar aktu administrativu, tanba ne’e aprezentasaun tenke enkamiña ba CNE tanba esperiénsia iha mundu tribunál só válida de’it rezultadu.

Hatán ba paresér ne’e, Deputadu Joaquim dos Santos, fundamenta imperativu konstitusionál ne’e kompeténsia ne’e Supremu Tribunál Justisa nian maibé kompeténsia hosi CNE nian halo serbisu supervizaun de’it.

“Tribunál tenke serbisu hamutuk STAE kona-ba dadus prosesuál hodi halo validasaun. Kuandu ita fó kompeténsia ba CNE signifika tribunál mós sei iha rekursu. Ita hili dala-ida ba tribunal nune’e hotu ona ka fó uluk ba CNE depois iha tán rekursu. Problema iha-ne’e. Se kompeténsia ne’e ita atribui ba CNE kuandu ema ruma protestu tribunál funsiona, maibé ita fó direitamente ba tribunál kuandu hotu, hotu ona,” nia hateten.

Nune’e paresér hosi CNE hateten koordenadór lokál STAE mak prezide sentru apuramentu munisipál maibe CNE rekomenda tenke prezide direta hosi Komisáriu CNE sira.

Hatán ba paresér ne’e, Prezidente Komisaun A ne’e argumenta, CNE nia kompeténsia ne’ebé lei fó ne’e superviziona serbisu tékniku eleitorál.

“Se CNE mak prezide entaun se mak superviziona. Se lei fó, CNE bele halo maibé lei la fó. CNE labele halo. Problema iha-ne’e. depois ita sei haree iha debate espesialidade. Se maioria deside fó kompeténsia ba CNE signifika CNE halo serbisu rua, ida halo serbisu tékniku no ida seluk halo serbisu supervizaun,” nia dehan. 

Tuir nia, STAE mak tenke prezide sentru apuramentu munisipál tanba serbisu tékniku depois foti desizaun asina akta.

“Importante liu mak kria kondisaun ba serbisu tékniku administrasaun ninian. Ita kria lei tenke kria kondisaun favorável ba STAE atu STAE halo serbisu didi’ak relasiona ho apuramentu, relasiona ho resensiamentu no kria kondisaun CNE hodi halo supervizaun di’akliu. Ida-ne’e mak importante liu,” nia relata.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here