Ministru Transporte no Komunikasaun, José Agustinho da Silva. Imajen TATOLI/Egas Cristóvão

DILI, 24 maiu 2021 (TATOLI)—Ministru Transporte no Komunikasaun (MTK), José Agustinho da Silva, informa, iha tersa (25/05) ró-ahi ho naran KMP Tranship II, hosi  Surabaya, Indonézia sei to’o iha Dili hodi subtitui ró-ahi Berlin Nakroma no Success.

“Ró-ahi Berlin Nakroma avaria desde tinan 2020 to’o agora seidauk hadi’a ho razaun situasaun COVID-19, no ró-ahi Success sei ba halo manutensaun durante fulan-tolu iha Indonézia tanba desde halo operasaun iha Dili durante tinan-tolu seidauk halo  manutensaun,” Ministru José Agustinho, relata hafoin ramata reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.

Tuir governante ne’e, Governu presiza foti lalais desizaun hodi iha alternativa ba konetividade via marítima tanba servisu ne’e labele paradu.

“Kondisaun reál hatudu katak ró-ahi ne’ebé Governu kontrata avaria desde tinan kotuk, tanba ne’e presiza halo manutensaun, entaun iha situasaun ida-ne’e Governu laiha opsaun atu asegura movimentu marítima. Klaru katak iha situasaun Estadu Emerjénsia no Serka Sanitária, limita movimentu pasajeiru maski iha kazu esensiál balun bele fasilita maibé tenke iha koordenasaun,” nia akresenta.

Ministru dehan, MTK liuhosi Diresaun Nasionál Transporte Marítima buka solusaun atu asegura konetividade marítima, hodi asegura transporta nesesidade bázika, kombustível no konstrusaun ba populasaun Oé-cusse no Ataúro.

“Populasaun rai rua ne’e tenke aseguradu nafatin, entaun Governu iha kontestu ida-ne’e tenke iha opsaun atu asegura konetividade marítima hosi Dili ba rai rua ne’e,” nia hatutan.

Ro-ahi KMP Tranship II temporáriamente sei opera entre Dili-Oé-cusse no Dili-Ataúro hodi hein ro-ahi Belin Nakroma no Success ne’ebé iha prosesu manutensaun.

Governu liuhosi MTK halo ona kontratu ho kompañia Atralata Estrategi hosi Indonézia hodi bele opera ró-ahi KMP Tranship II iha Timor-Leste.

Kontratu ho kompañia estranjeiru ne’e ba kada fulan $220.000, ho ninia kapasidade tula pasajeiru hamutuk na’in-300 inklui sasán ho kapasidade tonelada 1.000-resin.

Bainhira atraka iha Portu Dili, KMP Tranship II sei submete ba protokolu saúde ligadu ho COVID-19, inklui pesoál sira ne’ebé iha ró laran sei submete ba regra ne’ebé Governu impoin.

Ró-ahi ne’e kontrata tuir prosedimentu hotu no prienxe hotu kritéria sira ne’ebé estabelese.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here