Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE da-XIV hosi Prezidente Repúblika, iha sala plenária PN, sexta (28/05). Imajen TATOLI/Egas Cristóvão

DILI, 28 maiu 2021 (TATOLI)—Parlamentu Nasionál (PN), sesta ne’e autoriza ona Prezidente Repúblika, Francisco Guterres ‘Lú Olo’ dekreta deklarasaun estadu emerjénsia ba dala-XIV iha territóriu nasionál.

Notísia Relevante: KE-KSDS rekomenda ba Xefe Estadu husu PN estende Estadu Emerjénsia

Renovasaun deklarasaun estadu emerjénsia ba dala-XIV aprovadu ho rezultadu votasaun nominál a-favór 35 no abstesaun 21 nune’e autoriza Xefe Estadu sei dekreta estadu emerjénsia ba loron 30 tán, hahú hosi oras 00.00 iha loron 2 juñu 2021 (kuarta-feira) no termina iha oras 23.59 loron 1 jullu 2021 (tersa-feira).

“Lei autorizasaun ba renovasaun estadu emerjénsia aprovadu, husu ba governu implementa didi’ak ho responsabilidade no husu Governu kontinua sensibiliza regra sira ema hotu,” Prezidente Parlamentu Nasionál, Deputadu Aniceto Longuinhos Guterres, anunsia liuhosi plenária.

Xefe Bankada Frente Revolusionária Timor-Leste Independente (FRETILIN), Deputadu Francisco Miranda Branco, apela ba Governu implementasaun labele hasoru diskriminasaun iha terrenu.

“Ami apela ba sosiedade tomak, liuliu líder sira, atu kumprimenta regra sira-ne’ebé Estadu deside tanba se lae enfrakese Estadu direitu demokrátiku. Ikusliu ami apela ba Governu se ita deside konfinamentu obrigatóriu tenke impoin, ita lakohi Estadu ne’e sai Estadu banana,” Xefe Bankada FRETILIN nia intervensaun iha estensaun estadu emerjénsia ba dala-XIV.

Bankada FRETILIN husu Sentru Integradu no Jestaun ba Krize (CIGC-sigla portugés) atu hamenus burokrasia deslokasaun populasaun nian ba munisípiu sira, liuliu autorizasaun ba populasaun tenke lalais.

Entretantu, reprezentante Bankada Congresso de Reconstrução de Timorense (CNRT), Deputada Virgínia Ana Bela, lamenta tanba kada fulan Governu aprezenta hela de’it estensaun estadu emerjénsia.

“Ohin, dala ida tán CNRT hatudu nia firmeza polítika katak estensaun estadu emerjénsia hosi I to’o XIII (decimo-terseiro) ne’e la hatudu efisiénsia no efikásia iha luta atu prevene COVID-19 iha Timor-Leste,” Deputada Virgínia Ana Belo hateten.

Bankada CNRT haree katak medida sira-ne’ebé Governu foti laiha seriedade hodi ikus mai COVID-19 tama to’o iha nivel tranzmisaun Komunitária, maske Governu fakar ona osan liu millaun $230 hosi millaun $621 ne’ebé tau iha fundu COVID nian.

Bankada CNRT hateten, povu tomak sai sasin ba Governu nia inkapasidade halo jestaun ba COVID-19 maka rezulta COVID-19 tama mai Timor-Leste no ikus mai sai tiha polémika ne’ebé halo povu maka sai vítima.

Iha biban hanesan, Reprezentante Bankada Partidu Libertasaun Populár (PLP), Deputada Domingas dos Santos, kontinua esforsu Prezidente Repúblika, Primeiru Ministru, membru governu tomak no ekipa liña frente sira iha vijénsia COVID-19.

Bankada PLP observa katak, ekipa liña frente sira hasoru obstákulu iha terrenu hodi halo prevensaun ba surtu COVID-19.

“Efeitu hosi serka sanitaria no konfinamentu obrigatóriu halo uma kain vulnerável sira hahú menus ai-haan, ami hein intervensaun governu nian ba bairru sira-ne’ebé krusiál no buka mekanizmu ne’ebé di’ak hodi fó subsísiu ba populasaun iha territóriu tomak,” nia dehan.

Bankada PLP husu Ministériu Saúde (MS) kontinua implementa programa vasinasaun iha territóriu nasionál nune’e forsa hasoru propagasaun surtu ne’e.

Nune’e mós, Vise-Xefe Bankada Kmanek Haburas Unidade Nacional Timor Oan (KHUNTO), Deputadu António Verdiál de Sousa, husu ba Ministériu Saúde atu kontrola fatin izolamentu sira iha territóriu nasionál tanba ema sira-ne’ebé tama iha fatin refere uza fali ba diskoteka.

“Ami preokupa eskola tékniku vokasional (STM) iha Bekora, ita halo fali ba izolamentu, ne’e hatudu katak ita lakohi ita-nia oan sira la eskola, tanba ne’e  ami husu ba Governu reativa fila-fali eskola iha fatin ne’ebé aplika serka sanitaria,” Bankada KHUNTO husu.

Mensajen Prezidente Repúblika Francisco Guterres ‘Lú Olo nian, propoin ba Parlamentu Nasionál atuhalo estensaun estadu emerjénsia  ba loron 30 tán iha territóriu nasionál ho parsialmente suspende sirkulasaun internasionál, liberdade sirkulasaun, direitu reuniaun no manifestasaun, liberdade kultu (culto) inklui limita no proibisaun selebrasaun relijioza.

Nune’e mós dieitu ba edukasaun inklui halo suspensaun temporária ba prosesu no atividade ensinu aprendizajen ho rejime prezensiál, direitu propriedade no inisiativa ekonómika privada.

Purtantu direitu rezisténsia sei impede hosi autoridade públika bainhira sidadaun sira la kumpri medida ezekusaun sira.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here