Membru PNTL hala’o patrullamentu hodi asegura situasaun serka sanitária iha Dili, sesta (12/03/21). Imajen Tatoli/António Gonçalves.

DILI, 02 juñu 2021 (TATOLI)—Polísia Nasionál Timor-Leste (PNTL), kontinua halo preparasaun liuliu jere rekursu atu asegura festa demokrasia hanesan eleisaun Prezidensiál iha 2022 no eleisaun Paralamentár iha 2023.

“Teste ida tan maka tenki asegura atividade tomak kampaña polítika eleisaun jerál Prezidensiál 2022 kontinua to’o eleisaun Parlamentar 2023,” Komandante Jerál, Komisáriu Polísia, Faustino da Costa, hateten iha Caicoli, kuarta ne’e.

Notísia relevante:MAE relata preparasaun eleisaun prezidensiál 2022 ba PR

PNTL sei koordena mós ho Unidade Korpu Seguransa Pesoál (CSP sígla portugés), atu prepara efetivu-sira ne’ebé sei eskolla hodi asegura kandidatu Prezidente-sira bainhira presiza sira-nia prezensa.

Komisáriu Polísia, Faustino da Costa hatutan, bainhira membru efetivu PNTL la to’o, Komandu PNTL sei koordena ho Komandu FALINTIL Forsa Defeza Timor-Leste (F-FDTL), hodi fó apoiu ba seguransa konjunta iha teritóriu tomak.

Faustino da Costa foti referénsia katak, durante 2020 to’o 2021, PNTL halo serbisu másimu tebes hodi garante implementasaun Estadu emerjénsia, Serka Sanitária no Konfinamentu Domisiliáriu nu’udár teste ida atu haree serbisu instituisaun-nian nune’e bele kontinua mobiliza rekursu iha aspetu hotu-hotu.

Iha fatin hanesan, Vise Ministru Interiór, António Armindo, dehan Governu sei sosa tan karreta 25 hodi apoia PNTL, atu bele hala’o operasaun to’o asegura eleisaun Prezidensiál no Parlamentár.

“Ita sei sosa tan karreta hodi bele fahe ba polísia eskuadra-sira ne’ebé seidauk hetan, nune’e bele ajuda PNTL halo serbisu ho diak liu-tán,” António Armindo, hateten.

Nia mós promete sei kontinua buka apoiu hosi doadór-sira no parseiru dezenvolvimentu-sira atu apoia Ministériu Intérior liuliu instituisaun seguransa iha parte lojistika no seluk-tán.

Oras-ne’e daudaun, membru PNTL ativu iha territóriu tomak hamutuk 4.000-resin destakadu iha unidade hotu-hotu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here