Ministru Turizmu, Komérsiu no Indústria, José Lucas do Carmo da Silva, bainhira halo entrevista esklusiva ho Agência Tatoli iha ninia knaar fatin, Mandarin, tersa (25/08). Imajen Tatoli/Joanico de Araújo

DILI, 11 setembru 2020 (TATOLI)-Ministériu Komérsiu no Indústria (MTKI) daudaun ne’e prepara partisipasaun Timor-Leste iha Expo Dubai ne’ebé tuir planu sei realiza durante fulan-neen, hahú outubru 2021 to’o marsu 2022.

Ministru Turizmu Komérsiu Industria, José Lucas do Carmo da Silva, informa parte MTKI sei promove produtu orijinál Timor-Leste iha eventu mundiál ne’e hanesan kafé luwak (laku-té), ai-han tradisionál no seluk tan.

“Ita hanoin atu lori kafé luwak maibé ekipa sira sei identifika didi’ak Timór nia rasik, ita mós hakarak promove ai-han ne’ebé avo sira iha tempu uluk ba mundu,” dehan Ministru ba Agência Tatoli, sesta ne’e, iha suai room, Timor Plaza.

Aleinde ne’e, MTKI mós hakarak lori rekursu minerál hanesan mármore, rekursu kultura hanesan dansa tradisionál no múzika kultura Timor-Leste.

Maski nune’e, ekipa Expo Dubai sei halo avaliasaun no selesaun ba kada produtu ne’ebé sei aprezenta iha eventu ne’e, hafoin re-instala filafali ekipa ne’ebé hahú serbisu iha 01 setembru ba preparasaun.

“Ekipa sira sei identifika didi’ak produtu atu halo promosaun iha Dubai, tanba iha Expo Dubai Governu hakarak promove orijinalidade produtu Timó nian. Tanba partisipasaun iha espozisaun ne’e ninia objetivu atu promove Timor-Leste ba futuru,” Ministru subliña.

Iha loron 6 agostu, Konsellu Ministru (KM) aprova projetu rezolusaun Governu ne’ebé prosede ba alterasaun dahuluk rezolusaun Governu númeru 20/2019, 14 jullu ne’ebé nomea Autoridade Nasionál ba Expo Dubai tinan 2020.

Iha alterasaun ne’e, Ministru José Lucas maka hanesan departementu governamentál ne’ebé responsável ba konsesaun, ezekusaun, koordenasaun no avaliasaun polítika, ne’ebé define no aprova ona hosi KM ba área turizmu, atividade ekonómika komersiál no indústria.

Expo Dubai la’ós ona direitamente tutela iha Primeiru-Ministru nian okos maibé MTKI maka sai responsável.

Governu Emiradu Árabe Unidu (EAU) deside adia espozisaun, ne’ebé tuir oráriu eventu mundiál ne’e sei realiza iha outubru 2020, maibé muda ba 2021 tanba pandemia COVID-19.

Iha área espozisaun, Timor-Leste hetan ona espasu atu halo aprezentasaun produtu iha espozisaun ho luan metru 250, ne’ebé oferese gratuitu no apartementu inklui viza ba ema importante Timor-Leste atu partisipa iha eventu ne’e.

Área ba espozisasaun kuaze ektare 438 iha Dubai Exhibition Center no sei partisipa husi nasaun 192 inklui Timor-Leste.

Antes ne’e, Governu deside aloka orsamentu millaun $2,1 hodi partisipa eventu mundiál ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here