Serimónia lansamentu loron mundiál la fuma tabaku iha otél Novo Turizmo, Dili, kuarta (02/06/21). Imajen/MS.

DILI, 02 juñu 2021 (TATOLI)—Global Youth Tabacoo Survey tinan 2019 hatudu katak, labarik iha Timor-Leste (TL) ho idade 13 to’o 15 pursentu 30 (30%) mak konsumu tabaku (fuma sigaru) ne’ebé maioria estudante.

Rezultadu peskiza ne’e Vise-Ministru Saúde, Bonifácio Mau Coli dos Reis, fó-sai iha ámbitu lansamentu loron mundiál la fuma tabaku iha otél Novo Turizmu, Dili, kuarta ne’e.

Notísia relevante:Timoroan ho idade adultu 71% ativu konsumu tabaku

“Rezultadu survey ne’e ilustra evidénsia mai ita katak, ita-nia labarik sira ho idade 13-15 ne’ebé maiória estudante, hahú uza sigaru. Peskiza revela katak 30% hosi ema fuma ona sigaru, ho idade ne’ebé sei nurak, ida ne’ebé estadu tau esperansa ba sira nu’udár futuru nasaun. Sira-ne’e duni mai oin sei sofre moras la hada’et krónika sedu liu,” Bonifácio Mau Coli dos Reis, hateten.

Tema selebarasaun ba tinan 2021 maka ‘Kompromete Atu Husik’, ho-nia esénsia hakarak atu fanun ema fumadór ativu-sira, no ema ne’ebé hanoin atu fuma, hodi halo reflesaun oitoan kona-bá atitude uza sigaru no fanun konsiénsia Timoroan hotu-hotu atu hateke ho neon mós kona-bá impaktu loloos ne’ebé sigaru hamosu ba ema, la’ós de’it ba ema-nia saúde, maibé ba mós sósio-ekonómiku no ambiente.

Governante ne’e hateten, loron mundiál la fuma tabaku nu’udár eventu importante ba komunidade internasionál tomak, inklui TL, tanba liuhosi eventu ne’e bele sensibiliza no hasa’e liután koñesimentu populasaun tomak kona-bá impaktu negativu hosi tabaku.

Tuir ponto de vista MS, faktus ne’ebe provadu sientifikamente hatudu katak, tabaku iha efeitu negativu barak tanba fasilita hamosu moras krónika la hada’et oioin ba ema, moras krónika la hada’et Doenças Cronicas Não Contagiosas hanesan, raan-midar ka diabetes mellitus, kankru, iis-boot, moras kardiovaskular inklui hipertensaun, stroke, atakasaun fuan no seluk tan mak sai kauza prinsipál ema lakon-vida no halo ema barak hetan difisiénsia iha Timor-Leste.

Analiza ba todan ekonomia hosi moras la hada’et krónika ne’ebé MS ho apoiu husi OMS hala’o iha tinan 2020, hatudu katak, moras krónika la hada’et maka responsável ba 45% kauza ema lakon-vida iha TL.

Hosi pursentu ne’e, barak liu kauza husi stroke ka derrame serebral no atake kardiaku. Timoroan sira-ne’ebé lakon-vida ho idade produtivu entre 30-59, 75% kauza hosi moras la hada’et.

Pandemia mundiál COVID-19 hamosu sindroma respiratóriu agudu grave ka SARS no halakon ona ema barak nia vida.

Vise-Ministru ne’e sita, Sientista-sira anunsia katak, ema ne’ebé fuma iha tendénsia atu hetan manifestasaun klínika grave bainhira hetan moras COVID-19.

Ho realidade ida-ne’e, nia enkoraja ema hotu-hotu kontinua hatudu konsisténsia iha esforsu atu redús prevalénsia fumadór iha TL no sei presiza kreatividade no inovasaun iha asaun-sira hodi bele atinji objetivu.

Asaun tuir-mai MS atu redús prevalénsia maka asegura implementasaun Dekretu Lei númeru 14/2016, 8 juñu 2016, kona-bá Rejime Kontrolu Tabaku, no husu ba liña ministériu-sira ativu liután iha implementasaun Dekretu lei ida-ne’e.

MS kompromete kontinua promove estilu moris saudável liuhosi asaun promosaun no edukasaun saúde, prepara fasilidade saúde atu fó atendementu ba ema-sira ne’ebé hakarak hapara fuma liuhosi estabelesimentu sentru hapara fuma ne’ebé sei hahú funsiona iha tinan ida-ne’e, hamutuk ho Ministériu Edukasaun, Juventude no Desportu hodi haforsa edukasaun ba estudantes-sira ho kurríkulu prevensaun moras la hada’et.

Bonifácio Mau Coli dos Reis lori MS nia-naran, apela dala ba komuidade tomak atu hado’ok an hosi fuma ‘tanba fuma hahalok ida-ne’ebé estraga saúde no osan, ikus-mai hetan fali moras.

MS mós agradese ba kolaborasaun hosi Organizasaun Mundial Saúde Timor-Leste (OMS-TL) iha esforsu atu redús prevalénsia fumadór iha TL, no mós apoiu ba eventu selebrasaun loron mundiál la fuma tabaku no ba ministériu, instituisaun-sira hotu ne’ebé kolabora di’ak iha asaun atu redús númeru fumadór iha rai-laran.

Loron Mundiál la fuma tabaku kada tinan selebra iha 31 maiu no 2021 MS deside hala’o atividade ne’e iha kuarta 2 juñu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here