Prezidente INSS, Longuinhos Armando Leite. Imajen TATOLI/Egas Cristóvão

DILI, 31 maiu 2021 (TATOLI)—Governu liuhosi Institutu Nasionál Seguransa Sosiál (INSS), segunda ne’e relata dadus provizóriu hosi entidade empregadór no fakultatitivu iha territóriu nasionál ne’ebé rejistu iha INSS ba programa “apoiu ba empregu” ne’e ho totál hamutuk 5.095.

Notísia Relevante: INSS rekolla dadus provizóriu “apoiu ba empregu” hamutuk 2.000-resin

“Dadus provizóriu ne’ebé ami simu no rejistu to’o 27 maiu liubá ne’e hamutuk 5.095. Hosi entidade empregadór iha 1.311 no fakultativu iha 3.784 ne’ebé ita verifika ona,” Prezidente Konsellu Administrasaun Institutu Nasionál Seguransa Sosiál (INSS), Longinhos Armando Leite, hateten ba jornalista sira liuhosi konferénsia imprensa, iha Caicoli.

Hosi dadus provizóriu ne’e munisípiu lima mak seidauk submete dadus ba INSS mak munisípiu Baucau ho Viqueque tanba serka sanitária, munisípiu Aileu, Ermera no Rejiaun Administrativa Espesiál Oé-Cusse Ambeno (RAEOA) tanba dook.

“Ba munisípiu sira-ne’e, ami simu ona informasaun katak orsida ami-nia tékniku INSS ho ekipa hosi rekollamentu dadus apoiu empregu Munisípiu Baucau ho Viqueque nian iha fronteira, ne’ebé Polísia sira hein ba atu simu dadus ne’e,” nia hateten.

Nia informa, totál dadus provizóriu hosi munsisípiu Dili nian ba entidade empregadór no fakultativu ne’ebé resjistu besik 3.000 mak tama ona iha INSS. Hosi dadus hirak ne’e, dadus ne’ebé seidauk verifika kuaze 200-resin maibé sei iha prosesu verifikasaun nia laran.

Tuir nia, implementasaun pagamentu ba programa “apoiu ba empregu” ne’e sei kleur, tanba dadus hosi Munisípiu balun seidauk submete ba INSS no rejistu liuhosi online mós seidauk verifika.

“Atu halo pagamentu seidauk bele define tanba ita sei halo prosesu verifikasaun dadus hotu-hotu ne’ebé ita simu ona ne’e. Ita mós tenke ajuda Governu liuhosi verifikasaun dadus, labele selu de’it bainhira verifikasaun seidauk loos,” nia dehan.

Oinsá kona-ba maiória entidade empregadór no fakultativu ne’ebé seidauk rejistu, nia hatán, INSS la’o tuir de’it regra ne’ebé Governu aplika katak rejistu ba “apoiu ba empregu” ne’e hahú iha loron 04 maiu no ramata iha 27 maiu, entaun INSS sei la simu ona rejistu foun.

Notísia Relevante: Governu fó flesibilidade sidadaun asesu apoiu sosiu-ekonómiku iha ámbitu konfinamentu

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here