Koordenadór advokasia FONGTIL, Ivo Colimau Lay. Imajen Tatoli/Arminda Fonseca

DILI, 02 juñu 2021 (TATOLI)-Forum Organizasaun Naun Governamentál Timor-Leste (FONGTIL) halo monitorizasaun iha Munisípiu Covalima iha situasaun serka sanitária, “deskobre” katak mákina teste swab rua  iha Ospitál Referral (HR, sigla portugés) Covalima avaria.

Notísia Relevante : FONGTIL apela Governu asegura nesesidade báziku ba populasaun iha fronteira

Koordenadór Advokasia FONGTIL, Ivo Colimau Lay hateten, área saúde nian iha Munisípiu Covalima kona-ba estoke ai-moruk laiha problema, tanba bazeia ba monitorizasaun ne’ebé FONGTIL halo no mós informasaun ne’ebé hetan hosi autoridade Munisipál Covalima katak daudaun ne’e ai-moruk sei sufisiente.

“Maibé iha defisiénsia tékniku balu iha laboratóriu HR-Covalima mak mákina ba teste swab ne’e iha haat, maibé ho situasaun agora daudaun ne’e rua avaria, entaun ita haree katak ida-ne’e prejudika pesoál saúde-sira atu atende lalais komunidade bainhira halo teste swab ho lalais,” Ivo Colimau Lay, hateten liuhosi konferénsia imprensa iha Salaun FONGTIL, Caicoli, Dili, kuarta ne’e.

Haree ba situasaun ne’e, FONGTIL husu atensaun hosi parte nasionál atu bele hadi’a mákina refere, hodi nune’e, bele responde ezijénsia iha terrenu atu komunidade iha ne’ebá bele halo teste swab iha tempu badak atu bele hetan rezultadu hodi bele halo viajen entre munisípiu ho munisípiu.

Iha FONGTIL nia observasaun  ka monitorizasaun nota  mós deskuida balu iha terrenu kona-ba sósiu, ekonómiku no kultura, hanesan edukasaun infraestrutura kobre enerjia aqua potavél no mós estrada públiku, agrikultura no mós kona-ba alimentasaun.

“Liuhosi monitorizasaun ne’e ami rekolla informasaun balu kona-ba edukasaun ne’ebé ami deteta katak implementasaun ba klase online la efetivu ba kreximentu pensamentu, estudante-sira hosi Pre-primária, Pre-sekundária no sekundária tanba kabe fila-fali ba iha potensialidade no kapasidade,” nia dehan.

Nia haktuir, tanba estudante balu família iha kbiit bele fornese instrumentu eletróniku-sira, maibé família ne’ebé laiha kbiit menus rekursu hanesan telefone ho modelu android, no mós atu sosa pulsa asesu ba klase online ne’e maioria mak la partisipa.

FONGTIL propoin no halo submisaun ba Administradór Munisípiu hanesan reprezentante autoridade Governu nasionál iha Munisípiu bele koordena ho Ministériu Edukasaun atu muda klase online ne’e muda fali ba prosesu aprendizajen baibain.

Kona-bá setór agrikultura, FONGTIL haree katak daudaun ne’e povu sira-nia natar balu di’ak no balu ladi’ak ho razaun tanba irrigasaun iha Munisípiu Covalima ladún razoavel entaun prejudika kanalizasaun bee ba iha povu-nia natar.

FONGTIL propoin ba Administradór Munisípiu Covalima hodi koordena ho diresaun agrikultura munisipál nian atu bele halo intervensaun ba irrigasaun mota Tafara, nune’e bele normaliza kanalizasaun bee ne’e ba povu-sira nia natar.

Eskola online durante ne’e ladún efetivu

Hosi sorin seluk, Administradór Munisípiu Covalima, Francisco de Andrade hateten, kona-bá área edukasaun sei hein despaixu hosi Governu liuhosi Ministériu Edukasaun, Juventude no Desportu (MEJD), maibé daudaun ne’e polítika ne’ebé Munisípiu atu implementa mak prosesu aprendizajen bele la’o mas kontinua kumpre medida-sira pevensaun COVID-19 nian.

“Ami rekoñese katak eskola online durante ne’e ladún efetivu tanba ekonomia kada família la hanesan, entaun ami foti ona desizaun katak prosesu aprendizajen sei la’o, maibé depende sala de aula. Sala de aula ne’e luan ita bele akumula ema na’in-10 to’o 15, maibé prosesu aprendizajen ne’e la hanesan baibain katak lisaun estudante atu hetan lisaun hotu kada sala aula hetan de’it oras ida,” nia dehan.

Kona-ba agrikultór ne’ebé daudaun ne’e komunidade nia hare balu ladún di’ak, nia hateten, diretór agrikultór Munisípiu nian horiseik ba haree ona fatin irrigasaun Tafara, maibé irrigasaun ne’e depende ba bee-mota, ne’ebé tempu bailoron irrigasaun ne’e fahe bee la to’o tanba bee menus.

“Horiseik diretór agrikultór ba haree no kompañia lokál balu oferese mina enxe ba eskavadora atu halo normaliza  kanalizasaun irrigasaun mota Tafara nian. Ami  espera katak bele normaliza lalais,” Administradór Munisípiu Covalima, Francisco de Andrade, informa.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here