Produtu nesesidade báziku. Imajen espesiál

DILI, 24 fevreiru 2021 (TATOLI)—Diretór Ezekutivu Forum Organizasaun naun Governamental Timor-Leste (FONGTIL), Daniel Santos do Carmo, hateten sosiédade sivil liuhosi Forum Organizasaun Naun Governamentál Timor-Leste (FONGTIL) hakarak apela ba Governu atu asegura nesesidade báziku ba populasaun iha área fronteira.

“Bainhira serka sanitária munisípiu sira liuliu iha fronteira ne’e, ita husu ba Governu atu asegura nesesidade báziku ba populasaun sira tanba iha relatóriu balun hateten agora ami sosa foos ne’e $18 tiha ona. Entaun, ita lakohi atu sira hamlaha no mate tanba virus, ho ne’e oinsá mak Governu asegura nesesidade báziku sira atu iha munisípiu sira,” Diretór Ezekutivu FONGTIL, Daniel Santos do Carmo, ba jornalista sira hafoin remata partisipa reuniaun KSDS iha Palásiu Prezidensiál, Bairu-Pite, Dili, kuarta ne’e.

Nia dehan, asegura nesesidade báziku hanesan Sentru Lojístika Nasionál (CLN-sigla portugés), fundu COVID-19 ne’ebé Governu iha rekursu uitoan bele asegura.

Tanba ne’e mak FONGTIL sujere, fó hanoin ba iha Konsellu Superior Defeza no Seguransa (KSDS) atu Governu bele toma ba ida-ne’e, nune’e bele halo intervensaun karik bainhira nesesidade báziku sira iha terrenu hetan problema.

Tanba ne’e, FONGTIL iha hanoin ida fó livremente ba sosiédade sivíl atu bele halo movimentu ba iha área sira-ne’e, bainhira liga ho emerjensia tanba ONG barak servisu ne’ebá, entaun oinsá mak seguransa bele fó autorizasaun sira para bele tama.

“Maibé, ohin ami mós garante katak oinsá mak halo tuir protokolu Ministériu Saúde nian, distánsia sosiál, distánsia fiziku, uza máskara, hand sanitizer atu garante ami-nia seguransa bainhira ba iha área servisu nian,” nia hateten.

Alende ne’e, nia dehan, atu halo screening masál ba munisípiu sira tenke halo hotu tanba hanesan agora iha Suai halo de’it iha Postu Administrativu Fatumea maib’e Suai Villa la halo teste hotu, maibé distánsia Fatumea ba Suai Villa ne’e kilometru 40 de’it no agora estrada di’ak. Entaun movimentu ojek sira-ne’e la to’o oras ida, sira to’o tiha ona iha Suai Vila, entaun tenke teste mós Suai Villa iha merkadu ne’e.

Maibé, tuir nia, dala ruma atu tau konsiderasaun ba asuntu ekonómiku ne’e ema dehan tama merkadu oinsá, tanba ne’e mak FONGTIL husu Governu atu asegura nesesidade báziku.

Molok ne’e, Administradór Postu Fatumea, Filomeno Cardoso rekuñese negosiante sira hasa’e presu nesesidade báziku, la’os de’it foos maibé supermie kaixa ida antes ne’e faan $6.00 ne’e faan $8.00 ka sa’e ba $6.00 to’o $7.00 no seluk tan.

“Lo’os duni antes ne’e sasán folin faan normál hela, maibé desde implementasaun EE nesesidade báziku nia folin sa’e makaas,” nia afirma.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here