Membru Polísia Nasionál Timor Leste (PNTL), liu hosi Unidade Tránzitu, hala’o pasa revista iha área estádiu munisipál Dili, no kontinua halo sosializasaun regra serka sanitária ba komunidade, segunda (17/05/21). Imajen Tatoli/António Gonçalves.

DILI, 01 juñu 2021 (TATOLI)—Durante fulan maiu, Polísia Nasionál Timor-Leste (PNTL) rejista kazu insidente no asidente hamutuk 41, ne’ebé maioria kazu violénsia doméstika ho totál 13.

“Hosi totál kazu 41 ne’e, kazu violénsia doméstika aas liu ho númeru 13, baku-malu 12, asaltu-malu grupu iha sia, tuda-malu iha haat, tuda ambulánsia ida. Alende ne’e kazu asidente iha rua,” Portavóz Komandu Jerál PNTL, Superintendente Xefe, Arnaldo de Araújo, hateten ba jornalista-sira iha Komandu Jerál PNTL, Caicoli, tersa ne’e.

Notísia relevante: Loron sanulu PNTL rejista kazu asidente 36  

Dadus ne’e hatudu katak, kazu violénsia doméstika, PNTL rejista iha munisípiu hotu-hotu no barak liu akontese iha Dili.

Kona-bá kazu asaltu-malu haat ne’ebé PNTL rejistadu, akontese iha 25 maiu tuku 19:15 otl iha suku Kasa munisípiu Ainaro, grupu joven ataka-malu hodi rezulta balun sofre kanek.

PNTL to’o kedan iha fatin akontesimentu hodi halo atuasaun no detein suspeitu balun inklui salva kedan vítima na’in-haat hanesan, Candido do Carmo hetan hana ho rama-ambon iha isin-lolon, Crispim Bianco hetan taa iha liman, Natalino Gomes hetan tuda ho fatuk kona isin-lolon, no Anibal Bianco hetan tuda to’o kanek iha isin-lolon.

PNTL munisípiu Ainaro detein kedan suspeitu-sira ne’ebé deskonfia envolve iha kazu ne’e no halo apreensaun ba sasán evidénsia-sira hanesan rama-ambon no investiga suspeitu-sira no aprezenta ona kazu ne’e ba Ministériu Públiku (MP).

Jornalista: Eugénio Pereira

Editór: Cipriano Colo    

HAKEREK NO HATÁN

Please enter your comment!
Please enter your name here