Membru PNTL hala'o patrullamentu iha área Klínika Kampung Baru, Comoro, durante implementasaun serka sanitária iha Dili, kinta (11/03/21). Imajen Tatoli/António Gonçalves.

DILI, 10 maiu 2021 (TATOLI)—Polisia Nasionál Timor-Leste (PNTL), rejista kazu asidente 36 iha territóriu durante loron sanulu, hahú hosi 1 to’o 10 maiu 2021.

“Kazu asidente ladún barak tanba ita-nia membru-sira halo kontrolu makaas durante implementasaun Estadu emerjénsia, no movimentu ema mós ladún makaas hanesan tempu baibain,” Portavóz Komandu Jerál PNTL, Superintendente Xefe, Arnaldo de Araújo hateten ba jornalista-sira  iha Komandu Jerál,  Caicoli, segunda ne’e.

Notísia relevante:Konfrontu iha Surikmas, PNTL detein joven na’in-tolu

Kazu-sira ne’ebé rejistadu, mak hanesan, asalta-malu 17, baku-malu lima, tuda-malu tolu, destrui públiku ida, violénsia doméstika sia, tuda rahun ambulánsia ida.

Komandu Jerál PNTL kontinua orienta Komandu  munisípiu 12 inklui Rejiaun Administrativa Espesiál Oecusse Abeno (RAEOA), atu hala’o seguransa hodi minimiza kazu krime no asidente tráfegu.

Tuir observasaun, iha Dili laran, membru PNTL hosi unidade-sira, destakadu iha estrada públiku, hodi halo sensibilizasaun kona-bá aplikasaun Estadu Emerjénsia, inklui prevensaun COVID-19 ba komunidade.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here