Espoza Prezidente Repúblika, Cidália Nobre Lopes Mouzinho Guterres, bainhira simu husi labarik no Madre sira iha visita ba iha Orfanatu Madre Alma iha praia Coqueiros, Dili. Imajen Tatoli/Antonio Goncalves.

DILI, 01 juñu 2021 (TATOLI)—Espoza Prezidente Repúblika, Cidália Nobre Lopes Mouzinho Guterres hamutuk ho Plan Internasional, tersa ne’e hala’o vizita no fó apoiu umanitariu ba labarik defisiénsia iha kongregasaun madre Asosiasi Lembaga Misionaris Awam (ALMA) iha Pantai Kelapa, Dili.

Notísia Relevante: COVID-19: Governu sei esforsu labarik sira asesu edukasaun

Espoza PR ne’e hateten, iha selebrasaun Loron Mundiál Labarik ne’e labarik sira iha Timor-Leste labele selebra tanba pandemia COVID-19, entaun nia parte hala’o de’it vizita hodi fó korajén no anima labarik defisiénsia sira-ne’ebé hela iha kongregasaun refere.

“Estadu nia haree ba labarik defisiénsia mak oinsá fó apoiu másimu ba labarik kiik-oan sira liu-liu labarik sira ne’ebé hela iha Madre ALMA no ba organizasaun sira-ne’ebé servisu liga ho labarik. Ohin, ami mai ho ami-nia parseiru Plan Internasional hodi fó apoiu ai-han balun ba labarik sira no Plan Internasional mós iha programa ne’ebé sei apoiu ba alin oan sira iha tempu oin mai,” Espoza PR hateten ba jornalista sira, tersa ne’e.

Entretantu, Superiora Kongregasaun ALMA, Me. Getrudes Bidi agradese ba Espoza Prezidente Repúblika ho nia ekipa tomak tanba bele vizita labarik defisiénsia sira iha ALMA no fó apoiu ai-han hanesan foos, mina, supermie, ai-fuan masan (apel) no seluk tan.

Madre Gertrudes haktuir iha pandemia COVID-19 labarik defisiénsia ne’ebé hela ho família labele asesu ba eskola ka tuir aprendizajen no terapia, maibé labarik defisiénsia sira-ne’ebé mak hela iha ALMA kontinua tuir programa terapia.

Madre Superiora Alma Me Gertudes Bidi ALMA, .Imajen Tatoli/Antonio Goncalves.

“Labarik defisiénsia ne’ebé halo terapia iha ALMA hamutuk 52. Sira-ne’ebé terapia iha ne’e loron-loron mak labarik defisiénsia ne’ebé daudaun ne’e hela iha ALMA hamutuk 18, feto 15 no mane na’in tolu. No, profesora ne’ebé hanorin labarik sira iha 11, sira-ne’e mesak madre de’it,” nia hateten.

Maibé, nia dehan, hosi labarik defisiénsia 52 ne’ebé halo terapia iha ALMA maibé sira mós fó atendimentu ka tau-matan hodi halo terapia ba labarik defisiénsia sira ne’ebé hela iha sira-nia uma hamutuk 20-resin, ne’ebé sura hamutuk ne’e na’in-70-resin.

“Ami Madre sira ne’ebé hela iha ALMA ne’e moris hamutuk, aprende, no han no reza hamutuk ho labarik defisiénsia sira. Nesesidade saida de’it, ami mak kuida sira durante oras 24 nia-laran, ami laiha empregada ka pembantu. Servisu hotu-hotu iha ALMA, ami madre sira mak hala’o,” nia dehan.

Superiora ALMA ne’e informa, ezisténsia ALMA iha Timor-Leste la’ós hamriik mesak hodi apoiu no fó formasaun ba labarik defisiénsia sira maibé ALMA hetan suporta mós hosi Estadu no Governu inklui komunidade viziñu sira.

“Ami fiar ho providéncia divina ka penyelengaraan ilahi, ami bolu no ami iha fuan atu kuida sira maibé parte hotu ajuda ami no ami labele la’o mesak,” nia haktuir.

Inan-aman hamatan ba labarik defisiénsia sira

Tanba ne’e, madre ne’e husu ba inan-aman sira atu iha responsabilidade ba oan sira ka labarik sira-ne’ebé ho kondisaun defisiénsia, tanba hosi Maromak mak labarik sira-ne’e moris no inan-aman sira iha obrigasaun atu kuida ho didiak.

“Husu inan-aman atu iha responsabilidade ba oan sira liuliu labarik ne’ebé ho kondisaun defisiénsia. Labarik ne’e maihosi inan-aman maibé tan Maromak mak sira iha tanba ne’e presiza inan-aman nia nia kontrolu no kuida,” nia hateten.

Nune’e iha selebrasaun Loron Mundiál Labarik nian ne’e, madre superior ne’e hato’o mensajén ba inan-aman sira atu tau matan beibeik ba labarik sira no labele husik labarik sira moris mesak ka hela mesak.

“Ohin loron espesiál ba labarik sira. Tanba ne’e, ha’u hato’o mensajén ba inan-aman sira atu kuida no tau-matan ba labarik sira labarik iha Timor-Leste, tenke tau-matan ba sira-nia nesesidade. Ita tenke tau prioridade ba sira, pelumenus sira bele asesu ba eskola, tanba iha mundu labarik sira nunka husu inan-aman nia hakarak no fiar katak inan-aman sira iha responsabilidade ba oan sira,” nia dehan.

Ezisténsia kongregasaun ALMA iha mundu ne’e, ema barak gosta ajuda no apoiu ema ne’ebé eskola iha eskola di’ak no eskola ne’ebé selu karun maibé ba ema kiik sira laiha ema ida mak tau-matan.

Entaun iha momentu ne’ebá, bainhira Padre Paul Hendrikus Janssen CM hosi Belanda haree no nia dehan tenke ajuda no apoiu sira tanba ema hotu hanesan iha Maromak nia-matan.

Kongregasaun ALMA harii iha 2004 no seidauk iha fatin permanente maibé momentu ne’ebá ne’e sei halo kontratu de’it ba uma no ikus hetan uma ida-ne’e de iha 2006, no daudaun ne’e ALMA iha sentru eskola, uma formasaun, no ALMA mós iha habelar ona nia liras iha Alas-Manufahi.

Tuir nia, labarik barak mak hetan valór di’ak no iha eskola públiku balun iha Dili ne’ebé bele simu labarik defisiénsia hosi ALMA nian hodi kontinua sira-nia aprendizajen iha eskola.

“Ezemplu, ekola SD Tingkat Pantai Kelapa simu ALMA nia oan ida ba ne’ebá no ikus nia hetan valór boot (tama 10 besar). Seluk, ALMA nia ona ida tan eskola iha Eskola São Miguel Comoro mós hetan valór boot. Ho esforsu no esperiénsia ne’ebé mak madre sira iha, to’o ohin loron labarik defisiénsia iha ALMA barak mak sai matenek,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here